銀行為咗箍客，啲服務愈嚟愈貼心。好似民生銀行私人銀行部門尋日就喺北京成立咗個藝術品投資同收藏俱樂部，為班客戶提供專業嘅藝術品鑑賞、投資同收藏服務。
雖然民行講到明，想成為俱樂部會員，要先喺佢哋間行有最少800萬人仔存款，不過祖國富豪為數眾多，只要產品同服務吸引，相信客源絕對唔成問題。
近年內地富豪銀包水浸，除咗名車、名錶之類奢侈品外，古董、名畫呢啲藝術品嘅捧場客都愈嚟愈多。好似今個月佳得士喺紐約舉行嘅「印象派和現代藝術品拍賣會」，內地買家就勁活躍，對畢卡索、梵谷同莫內等大師級作品一擲千金。民行今次成立呢個藝術品俱樂部，就係睇到個勢，希望吸納更多高端客戶。
其實民行私人銀行業務非常多元化，唔單止會提供私募股權投資、保險、信託融資產品呢類資產管理服務，高端旅遊、醫療、藝術品鑑賞等非金融服務都係佢哋嘅業務範疇。
絲絲聽聞，民行早喺五、六年前，已經開始針對內地中產家庭，推出啲藝術品投資計劃，投資收益相當唔錯，今次再成立埋個俱樂部，相信可以吸引到一班鍾情藝術品投資嘅有錢客戶。