絲絲講場：Tesla馬斯克封「年度CEO」

Tesla股價本年至今已經累升咗超過300%，對一個CEO嚟講已經係一種難得嘅肯定，依家再喺超過1.2萬人投票擁護下，榮膺「年度CEO」，簡直雙喜臨門，恭喜晒！

朱仔邁耶同告落選

同馬斯克一齊競逐今屆「年度CEO」嘅人物都唔嘢小，以佢哋掌舵嘅企業今年股價升幅嚟排名，分別係Netflix（237.4%）嘅黑斯廷斯、LinkedIn（114.8%）嘅韋納、facebook（fb）（92.4%）嘅朱克伯格、雅虎（68.5%）嘅邁耶、西南航空（42.9%）嘅凱利。雖然統統畀Tesla比下去，但相信造福咗唔少股民。

銳意創新萬人擁戴

不過，馬斯克獲勝並非單憑今年剃盡「空軍」眼眉嘅股價走勢。MarketWatch特意引述佢舊年喺牛津大學嘅演講，豪言Tesla誓要創造比化石燃料汽車更強嘅電動車，證明呢顆勇於接受挑戰、克服自然法則嘅決心，先係令過萬人將佢推上「年度CEO」寶座嘅關鍵。

一眾落選者當然毋須傷心，尤其是朱克伯格。事關Instagram現時估值可能高達150億美元，盛傳搞到上年用10億美元就賣畀fb嘅創辦人斯特羅姆好唔忿氣。朱仔聽到呢段消息後，應該會開心番晒啦。

余絲韻