理財創富：孖妹S檔案：缸湖秘笈5句話勝千金

藉管理層發掘卓越企業

盧：豐盛金融組合交易經理 盧志威

孖妹： 投資唔想「輸」錢，咁就要從「書」中學習贏錢之道喇，據悉呢十五本書當中，你就睇過四本了！

中大全球政經碩士課程客席講師 黃元山

五本商業名著 五個精華句子

　盧： 係呀，我睇過《異數》、《黑天鵝效應》、《精準預測》、《從優秀到卓越》！呢四本書非常出名，咪買嚟學吓嘢囉，點知睇完書後，真係增進不少金融及商業知識，唔止對我往後操盤有正面影響，就連揀股票，睇公司基本因素都有幫助。

孖妹： 哈哈，咁唔知我哋又適合讀邊本呢？

　盧： 你哋咁鍾意炒股，可以睇吓《從優秀到卓越》，作者Jim Collins係世界級管理權威及商業暢銷書作家，曾經喺美國史丹福大學教書，亦喺星巴克、麥肯錫等國際企業做過高層，呢本書透過大範圍嘅定性及定量分析，嘗試搵出一間企業如何由優秀達致卓越嘅成績。

孖妹： 呢本書嘅精警一句話係：「好公司要成為偉大的公司，就得正視他們生意中殘酷的現實，找出他們的獨到之處，創建出講紀律的文化，營造並維持源源不絕的動力。」你睇完之後有咩感想呢？

　盧： 一隻優質股票很大程度上係建基於一班優秀管理層，如果管理層有能力又有紀律性，喺經濟狀況良好時，其能力便可幫助企業更上一層樓，相反經濟觸礁時，亦由於他們擁有高度紀律性，唔會隨便胡亂做商業決定，從而減低各種營運風險。須知道，大部分股票分析員都無做生意經驗，又點識營運一間企業呀，所以呢本書令我更加了解優秀管理層應該具備甚麼條件，令我去探訪企業時，更懂如何向管理層提出更多深入尖銳嘅發問，有助我發掘更多具投資價值嘅好股票。

自我欺騙 易招「黑天鵝」

孖妹：咁你又點睇《黑天鵝效應》呢句：「人很善於自我欺騙，認為自己知道的比實際上更多，這點使得事件變得巨大、不尋常。」

　盧： 市場係可以出現你根本無諗過會發生嘅事件，而「黑天鵝事件」通常都有三大特性：不能夠被預測；衝擊力非常強大；事件發生後，人類會幫它製造一個解釋，令事件變成是可預測出來的，由此可見人類已經習慣用既定思考模式去分析事情，從而欠缺深刻思考嘅能力，而書中就舉了美國「九一一」事件令人震撼外，亦援引Google驚人成就等等，作為解釋「黑天鵝事件」例子。睇完呢本書後嘅最大得着，我亦學懂要時刻抱有危機意識，因為金融世界係變幻莫測嘅！

認識心理學拒盲從權威

黃：中大全球政經碩士課程客席講師 黃元山

孖妹： 你喺外國留學多年，一定睇過不少金融經濟名著，唔知十五本書當中，邊本書令你留下深刻印象呢？

　黃： 其實呢十五本書傾向商業及管理範疇多啲，不少都係九十年代時期嘅經典書籍，我睇過嘅只有五本，而影響我最深嘅係《影響力：說服的心理學》，其核心內容是講待人接物技巧如何影響別人、說服別人，當中牽涉不少心理學說，而六個重要法則：互惠、承諾、社會認同、喜好、權威及匱乏，就係研究「一個人改變其行為之原因」。若套用投資方面，其中「權威原理」便可作解釋散戶特別鍾意聽財金專家嘅股票推介，因為散戶覺得佢哋具有權威地位，故此傾向相信以及服從指令，變相專家推介邊隻股票，散戶就會聽話去買貨。

做「對」的事 炒「對」的股票

孖妹： 呢本書原來係教我哋防止被騙，咁真係要認真睇吓喇！

黃： 另外，《有效的管理者》一書亦係經典，作者Peter Drucker更有「管理學之父」稱號，該書宣揚一個道理：做「對」的事，而不是把事情做對；書中亦會講及管理階層如何透過高效能，協助企業把優勢達到最大成效，帶出在複雜商業環境之下，企業必須藉着高效管理而取得成功。當然，我認為任何人都應該學懂「管理」，正如散戶炒股亦一樣，要炒「對」的股票，而唔係每日都在進行炒炒炒呢個行為，只有妥善管理自己嘅投資態度、目標、情緒，投資才會變成一件對的事情。

學成功人士 做社會「異數」

孖妹： 《異數》一書作者並唔係甚麼金融界勁人，而是一位新聞記者，唔知呢本書講咩呢？

　黃： 我睇到一半已經無睇喇，呢本書係講成功人士嘅秘訣，講他們如何成為社會上嘅「異數」，不過書中內容並無任何理論基礎或統計學去做實證，即係你睇完成本書之後，都唔知信佢定唔信佢好？不過，呢個作者都好勁o架，本本書都好賣得，仲會環遊全球做讀書會講座。

若有料報畀高妹同彩兒或有嘢問，可電郵money.biz@opg.com.hk