孖妹S檔案：落盤程式講先機 Apps開發商通勝

無極：緊貼大勢 系統求「快而準」

高妹：近年勁吹科技風，騰訊（00700）炒高，網遊股大熱，似乎一牽連智能手機就能賺到盆滿缽滿，而你哋靠開發財經App搵食，應可受惠喎！

江：粗略估計，散戶用手機App落盤，去年初僅佔證券行成交額約10%，但現已增至40至50%，可見這是大勢所趨，同時帶動公司的每年收入以倍數增長。惟生意增加的同時，競爭亦見加劇，所以我們需靈活求變，同時亦要確保系統穩定及準確。你知道啦，如果買賣股票時出現死機等情況，再落單可能已差咗幾個價位，真係喊都無謂！

高妹：近年不斷有證券行出現「烏龍盤」，早前光証錯盤引起軒然大波，另前年有經紀欲以18.82元買入2.5萬股國壽（02628），卻錯誤把買盤股數輸入為「2,500,018,000」，最後系統竟將錯誤買盤分拆為834個較小的買盤執行。連電腦個Mon（屏幕）咁大都會入錯，何況手機畫面咁細，我哋落單時唔覺意撳多個「0」咪出事！

江：落單時有確認提示，股民要睇清楚，但若真的出現烏龍盤，就要看看運氣，講到尾戶口要有錢先能買貨。不過，如果因系統出錯而成交的話，大部分證券行會賠錢了事。

版面醒目 免價量倒轉

高妹：股民用App落單，最容易出現甚麼錯誤？

江：不少股民會把價錢及數量掉轉入，但這些明顯錯誤，系統會自然隔咗條刁，而我哋設計版面時，亦會憑經驗考慮相關因素，如買賣掣會大粒啲，以免散戶撳錯，盡量減低出錯機會，但他們若想搵藉口賴咗條刁，總能雞蛋裏面挑骨頭。

高妹：曾遇過無理的設計要求嗎？

江：暫時冇遇過無理要求，反而無知的要求就聽唔少，如「系統唔會死」、「唔使人為操作」等等。此外，近期有客人要求監察長和系主席李嘉誠的新聞，以助其分析長和系股價的走勢，但關於李嘉誠的新聞眾多，究竟哪類新聞才要呢？這些模棱兩可的想法，系統是無法達成的！

天匯：行內龍頭 坐擁過半市場

彩兒：講到股票交易App，你們可謂行內一哥呢。

譚：三年幾前iPhone剛興起時，公司已開始專注做財經，在行內發展較領先，所以吸引不少金融企業幫襯，現時本港超過六成的股票交易App都出自公司手筆。事實上，用App做股票買賣的人愈來愈多，今年生意額按年增逾一倍。公司客戶以銀行及證券行最多，由於好多人未能坐定定喺電腦前落盤，但有咗App之後，股民落多咗單，變相多咗生意，故金融機構紛紛開發應用程式。

主力做大客 度身訂造

彩兒：近年好多小型證券行倒閉，財經App個「餅」會否細咗？

譚：目前影響較小。因一個App的開發費用起碼要十幾萬，小型證券行本身已難以負擔，故我們收入來源多來自大型及中型證券行。

彩兒：證券行對財經App的設計會否要求多多？

譚：最基本的當然係安全、準確及穩定，其後便想具有一些「人冇我有」的特色，就好似耀才證券把其財經台加入App內給用戶瀏覽，永豐金融的投資產品以走馬燈形式報價，都是一些較特別的Idea。

彩兒：雖然用App落盤方便，但同電腦落盤會否一樣？

譚：用App落盤仲快喎。用手指操控，會比滑鼠較快、較直接，加上App的設計以方便為主，故有好多預設功能，股民只要Click幾個掣就可以落單。至於能否成功掛盤，則需視乎網絡傳送速度，惟手機網絡或會不穩定。

輝立：自家研發 合晒散戶口味

彩兒：點解你哋會選擇自行研發手機App，而不在外搵開發商？開發成本不會更大嗎？

周：這樣有較大的自主性，免卻與開發商磋商之餘，亦可加快系統更新速度，加上我哋經常接觸散戶，較了解其投資習慣及需求。另公司多年前已推出自家網上交易軟件，本身有IT團隊，故成本上較易控制，相較搵開發商便宜。

定期更新 系統趕潮流

彩兒：當中有咩難度？

周：最難係追上科技發展步伐，如iPhone不時更新iOS平台，故公司亦要定期更新系統。其實在智能手機剛冒起時，公司已開始研發Web Mobile及Blackberry平台，但隨着潮流轉變，便轉而開發iPhone及Android平台，並在兩年多前推出，方便散戶在同一平台上進行股票、外匯、期指等交易。現時公司約有30%的客戶經手機App做買賣。

彩兒：曾聽過嚴重的失誤嗎？最後怎樣善後？

周：最常聽到的亂子，多是落咗盤卻冇送出，或者撈亂了買沽指示，所以我哋會推出App教學，幫助散戶了解操作。另亦曾聽到程式報價上有數微秒的延誤，所以我哋為此花了若干時間進行調校工作，並引入實時串流報價。

（高妹）（彩兒）

若有料報畀高妹同彩兒或有嘢問，

可電郵money.biz@opg.com.hk