Market Insight：核電股係時候反擊

數據強而股市不跌，多得自六月在FOMC就放水投過反對票之後，近幾個月撐放水撐到出晒面的美國聖路易聯邦儲備銀行行長布拉德（James Bullard），認為以目前美國通脹僅1.2%，同目標水平2%仲有距離，聯儲局有空間維持QE3的買債措施。

騰訊（00700）睇「五舊」，似乎成為魚缸炒鬼同大行的新共識，回望年初不過250元左右，升成咁真係估都估唔到。

古勝冇點你04/11/201３

萬里長空

近日內地網股的炒風有愈演愈烈之勢，上周五中國旅遊網站《去那兒》（股份代號QUNR）在美國掛牌，招股過程經已夠巴閉，一而再上調，由最初9.5至11.5美元，捧到上12至14美元，最後以15美元拍板，比初訂上限價已經高三成，結果上市第一日試過翻一番去到34.99美元，最後收報28.4美元。

科網股熱持續升溫

一個未賺過錢網站，一上市值32億美元（去年營業額不過5,070萬美元），最開心要算百度（BIDU），一一年七月先以3.06億美元躋身網站大股東，手上五成八股份，兩年多時間升值六倍，依家愈嚟愈有二○○○年科網熱用眼球計價嗰隻feel。

聯儲局決定唔退市住，港股又再級級上，上周五個交易日有四日上升，累積升551點，上周五收報23,249點，又再向半年來，三次見頂的阻力區23,512至23,554點進發。上周中有迹象資金由outperfomer回流到估值便宜的內銀及內險股身上。不過，澳門公布上月博彩收入勁升三成去到364.77億澳門元，創史上新高之後，濠賭股都有炒番轉頭迹象。

此外，上周初調整的乳業股亦都拗腰回升，合生元（01112）上周五升5.1%，傳聞同日本和光堂合作攻嬰兒奶粉的康師傅（00322）升6.3%，強到無朋友的現代牧業（01117）再下一城，再升6.6%創新高。種種迹象顯示，落後股被捧，強勢股跌唔落，大孖沙似等住執平貨，多過想出貨，短期個市上破23,500點阻力機會應該唔細。

哈電再跌風險有限

聽老友講，近排北京天氣白濛濛，霧霾情況同舊年比無大改善。今屆中央領導願意犧牲些少經濟增長，減低對環境破壞，估計三中全會，潔淨能源及環保好有機會成為重點議題。事實上，sell核電設備需求復甦的東方電氣（01072），上周股價已開始搶高，電力設備呢個大大大落後板塊，有落鑊的味道。

睇番東氣首三季業績按年升3.5%，純利18.9億元（人民幣‧下同），同市場預期差唔多，大行估全年賺23億至23.5億元，市盈率8.7倍，以一四、一五年大約10至12%的年增長，估值合理，但純短炒，似乎哈爾濱電氣（01133）值博率更高。

上半年，哈電業績因為客戶押後甚至取消訂單拖累，盈利跌四成六得番3.75億元，衰到貼地，假如市場轉變睇法，行業低潮可能在今年第三季出現，就算街外賺8.8億元的預測打個八折，PE都係得7.6倍，0.44倍市帳率更係十年新低，哈電喺5港元樓下，點睇再跌風險都係有限，趁三中全會會期前夕應可一試。

電池股仍屬炒概念

其他板塊方面，電池股好耐冇動靜，上周五見超威動力（00951）股價升6%、中聚電池（00729）升5.4%，但天能動力（00819）則微跌0.6%收場。在內地致力推廣節能環保之下，環保汽車市場大有可為，但產品是否成功普及使用，關鍵之一乃電池的安全及耐用度。誰能成功研發出優質產品並作大量生產，便可開拓出財路。

然而，目前呢個板塊仍係講概念居多，跟風炒作只宜短線及嚴限注碼，長遠必須有待出現成功大規模量產兼賺錢的龍頭企業，始能確切得出一個合理的估值參考。

古勝