近期因為來港上市問題而成為新聞人物嘅阿里巴巴集團主席馬雲，下個禮拜五（8日）又喺香江蒲頭，今次佢係嚟接受香港科技大學商學院頒授榮譽博士學位，唔知到時佢會唔會再發表上市偉論呢？
以馬雲今時今日嘅地位，同喺商界取得嘅成就，今次取得呢個銜頭，絕對係實至名歸。所以聽聞有關單位，希望佢可以趁今次機會，同大家分享吓佢嘅成功經驗。
除咗成功之道外，相信唔少人對佢提出嘅合夥人制度，即係行政總裁必須由合夥人中選出，係咪有違本港「同股同權」核心價值，更感興趣。
港交所（00388）為阿里來港上市不惜「孤注一擲」，意圖透過市場諮詢，希望證監會轉軚，令阿里來港上市再露曙光。不過，尋日財經事務及庫務局局長陳家強就為事件降降溫，強調本港唔能夠因為競爭而令質素降低，任何上市制度嘅改變，必須保障上市公司質素。
佢仲話現行上市規則係由市場經驗和共識達致，「我不會講哪些（規則）一定可以改，哪些一定不可以改。但任何市場討論必建基於保障市場質素。」