絲絲講場：滙控風險總管做埋執董

風險管理愈嚟愈受重視，間間銀行都撥好多資源喺呢方面，滙控（00005）都唔例外。滙控尋日仲委任埋集團風險管理總監繆思成（Marc Moses）出任執行董事。佢喺○五年十一月加入滙豐，擔任環球銀行及資本市場業務財務及風險管理總監，並由○八年起兼管環球銀行及資本市場業務嘅營運同基礎設施。

繆思成自一○年十二月獲任命為集團風險管理總監，正如滙豐集團主席范智廉所講，委任繆思成表明董事會極之重視風險管理。

繆思成出任執行董事後，將收取基本年薪七十萬英鎊，同埋相等於呢項薪金50%嘅津貼，以作個人退休金安排之用。喺薪酬組合中，同表現掛鈎嘅部分將會根據滙豐集團薪酬委員會嘅政策釐定。現行政策規定，短期花紅唔可以多過薪金三倍。

滙控前排同美國監管機構對簿公堂，搞到要「守行為」，除咗加碼請多咗規管部門員工，今年三月仲請埋高銘（James B Comey）加入，佢做過政府機構，請佢返嚟明顯係想搞好公司嘅監管問題。不過，高銘好搶手，櫈都未坐暖就畀FBI撬去做局長。