絲絲講場:債王頓悟揚言捐身家

「債王」格羅斯(Bill Gross)講美國退市、講債價,大家聽得多,最近佢竟然喺Pimco網站嘅每月投資展望上,好感性咁話為自己擁有咁多財富感到內疚,極之贊成畀多啲稅,收窄貧富懸殊,死後仲會捐晒啲錢出嚟,大有發財立品嘅味道。

發達靠低稅 愧對工人

佢坦白咁交代自己嘅財富,係建築於工人身上,覺得好有罪惡感兼同情窮人。佢話自己同好多喺四十至六十年代出生嘅美國人一樣,享受經濟起飛年代嘅好處,受惠於列根及布殊年代嘅低稅率政策,至可以飛黃騰達。依家諗返轉頭,自己財富不斷增長,但勞工階層嘅利益卻一直受剝削。

籲權貴接受「富人稅」

格羅斯自認係美國最幸福嘅1%人之一,佢認為「資本利得稅比工人所付嘅稅更低,呢種時代應該要終結」,仲呼籲社會權貴,支持接受「富人稅」,唔好再做唐老鴨嘅叔叔Scrooge McDuck,即係吝嗇鬼、守財奴同貪得無厭嘅人。呢個呼籲,正正就係股神巴菲特一直倡議嘅。

格羅斯目前財富達20億美元,唔知佢係咪想發財立品呢,佢仲話同老婆已經有共識,喺離世前將捐出全部財產添。

余詩韻