美國早排有研究發現，一間上市公司如果有維權股東介入決策，長遠嚟講或者可以谷起業績同埋股價，但外界炮轟維權股東「搞搞震」嘅消息時有所聞。最新一單就係要求蘋果公司（Apple Inc.）用1,500億美元回購股份嘅艾肯，畀「債王」格羅斯喺Twitter點名批評。
話說格羅斯劈頭就叫艾肯「Leave Apple alone」，唔好再搞Apple，得閒就學吓微軟創辦人蓋茨，做吓慈善活動。
佢仲話，艾肯係咁醒，就應該諗吓點樣可以幫人，而唔係益自己，擺明寸艾肯講咁多嘢，都只係博自己揸住啲Apple股份有得升。格羅斯仲專登Tag埋艾肯個名，慌死佢見唔到咁，睇嚟「債王」真係幾勞氣。
艾肯逼唔逼到Apple回購股份好難講，佢只揸住470萬股Apple，佔流通量0.5%。有位基金經理專登做咗個表，列晒股權大過艾肯嘅機構，仲同啲客講，Apple最大股東係揸住4,700萬股嘅貝萊德，要教訓Apple幾時輪到艾肯？
艾肯都唔示弱，揚言如果Apple唔照佢建議做，就會拉攏其他股東再次施壓。