絲絲講場：美聯太子女高效婚嫁
美聯集團（01200）主席黃建業大女黃靜怡（Angela），上個禮拜六下嫁金融才俊，成為楊太。作為美聯副主席嘅Angela，出晒名工作勤力兼高效率，就連結婚呢件人生大事都以速度取勝，度蜜月只得十日八日，話要趕返香港做嘢。老公係佢大學同學，依家做私募基金，同樣鍾意工作，所以唔會詐型！
Angela上周六結婚，由接新娘、向長輩敬茶、行禮簽字、宴客，下午三點幾就完成，效率之高令絲絲驚嘆。新娘子喜歡陽光，特意揀下午舉行戶外婚禮，幸好天公作美。老竇黃建業，開心到全程四萬咁嘅口，有賓客同絲絲講，見到黃生拎住條手巾仔抹面，唔知係當日天氣熱，定係感動到流淚呢？
「磚頭」鑽石錶做嫁妝
黃家辦喜事，唔少親友專登喺外國飛返嚟，黃建業形容為「海陸空」出動，Angela嘅98歲婆婆，特地由美國飛嚟香港，飲孫女餐喜酒。
Angela收禮收到手軟，龍鳳鐲及金鈪多到兩隻手都戴唔晒，仲有十幾隻金鈪，要借助重型頸鏈掛埋上頸。佢笑言老竇最愛磚頭，送畀佢嘅嫁妝係「大磚頭」，而媽媽就送咗鑽石古董錶，希望能代代相傳，當日新娘子都有戴住出嫁！
婚紗特選本土設計
工作狂嘅Angela結婚後第三日已經返工，今日同老公出發度蜜月，好快又會返香港。
講到快，Angela為咗慳時間，結婚禮服都要快靚正，佢朝早斟茶同下午行禮，都係同一套婚紗，朝早就披多件披肩，望落好似着咗兩件不同嘅禮服。新娘為支持本土設計，特登請本地設計師朱潔麗幫佢設計婚紗，以簡約典雅為主調。
余詩韻