美股無因危機解除而上升，美匯亦無因為咁而反彈，因為下一個投資主題又去番退市問題上。
事實上，政府關門超過兩個星期，好多經濟數據都睇唔到，亦係令美國聯儲局唔敢膽貿然退市嘅最佳藉口，所以多位聯儲局官員都開始放風話依家講縮減QE就太早了，十月退市已經可以話係「不可能的任務」。
美國政客玩嘢，或衝擊商業信心連帶影響美國經濟，背後嘅代價係美元吸引力下降，睇睇連炒避險情緒都炒唔起嘅金價，單日都急升3.2%至1,322美元，而一眾外幣亦借勢反彈。
美元要反彈仲要時間，但睇番價位，澳元由八月0.88水平反彈，已經到達筆者心目中目標價0.965，重返1算機會仍然相當微，雖然要逆市做淡係需要勇氣，惟調整仍勢在必行，就算唔敢沽都唔建議再高追，建議0.968開盤博澳元調整，首站目標0.948，止蝕0.978。
GMO CLICK環球通副總裁 陳健豪