資深財資市場人士陳鳳翔（Wilson），鍾意旅遊之餘，仲鍾意「旅遊睇經濟」，中秋節期間去咗內蒙古，睇埋當地嘅人民幣跨境業務，又大讚當地嘅特色係「揚眉吐氣」（羊煤土氣）。
「揚眉吐氣」係羊毛、煤礦、稀土同天然氣取諧音，Wilson喺內蒙就發現當地真係資源豐富。其實Wilson已經唔係第一次趁旅遊實地考察人民幣跨境使用，舊年年底去過廈門同台灣，佢仲同絲絲預告下一次目標就係東北嘅黑龍江，睇吓到時又有咩金融新發現。
除內蒙之外，聽講中國同蒙古國邊防比中港更加簡單，Wilson留意到蒙古國市面已經同時流通當地本幣同人民幣。
Wilson今年喺內蒙過中秋，話第一次去大草原，感受到當年成吉思汗同蒙古帝國嘅氣勢，研究中蒙跨境使用人民幣之餘，仲拎咗套蒙古鈔票作為留念。
由於當時天氣好好，Wilson話好清楚睇到滿月同星星，而且個月亮仲好似特別圓添。Wilson仲趁機去蒙古遊覽咗好多地方，恐龍化石遺址同成吉思汗陵唔少得。
余詩韻