Market Insight：港匯轉強有利後市

昨日炒股唔炒市趨勢明顯，754隻股票上升，下跌股份549隻，升跌比例係1.37對1。大市愈逼近上次高位23,554點，熱錢分流向非指數成分股更為明顯。港匯九月底開始持續強勢，昨執筆時見7.753的一個月高位，與七月初高位7.7522一步之遙，似乎本欄一直擔心，內地經濟第四季動力不足會影響市況，是杞人憂天。

美國前財長薩默斯退出聯儲局主席輪選，鴿派的耶倫「坐正」，加埋聯邦政府拉閘影響第四季經濟，聯儲局大條道理將退市押後到明年伯南克卸任至算。

古勝冇點你2013/10/22

萬里長空

彭博最新調查，大部分預測退市去到明年三月至開始，同上月調查主流預期在十二月，睇法好唔同。美股屢創新高，採取聯匯系統的港元由六月低位回升，絕非無的放矢，熱錢有重回風險資產的趨勢，照咁睇，港股短期應該唔衰得去邊。

騰訊目標愈嗌愈高

昨日古勝聽到兩隻內銀新股徽商及重慶銀行，保薦行開始做緊前期工作，部分基金經理已經「見過」有關資料，估年底前上市，消息話目標定價，市帳率可能唔平得過現時幾隻中型內銀股，環顧目前內銀股投資氣氛唔算熱鬧，最引人入勝係用乜故仔去sale？萬一真係影子股適時發威的話，值得（目及）實的，應該係民生銀行（01988）及招商銀行（03968）。

隻騰訊夠晒癲，昨裂口見歷史高位455元，計落市值8,458億元，全球上市公司市值排名去到六十一位，喺香港排第七。排第六位嘅中行（03988）市值1萬億元，只係大佢18%，然而去年業績賺1,455億元人仔，足足多騰訊11.3倍。無他嘅，市場對互聯網及銀行業的前景睇法異常兩極化，估值也有雲泥之別，一隻51.6倍，一隻得5.8倍，如果按大行預測，騰訊今明兩年增長27.4%及26.1%，一四年PE講緊係32倍，肯定唔平，但亦不至於好離譜，難怪五百、一千的目標價，被口痕友當成口頭禪。

跟勢短炒 雲遊秤先

騰訊效應，兩隻半新股雲遊控股（00484）及IGG（08002）抖完氣之後，雙雙起舞，昨分別升6.1%及11%收報65.25及3.42元；雲遊主攻網頁遊戲開發，以網頁遊戲淨收入計，去年在內地排名首位，市佔率24%，觀察到其策略係魚翁撤網式每年推出大量遊戲，博幾隻作品成功跑出受玩家歡迎，上市集資目的係雙線發展，投放更多資源在手機遊戲上。

IGG同已擁有兩年賺錢紀錄的雲遊最大分別係，以新加坡為基地的IGG尚未達致收支平衡，公司開發多種語言網頁、客戶端及手機遊戲，同樣地大部分遊戲可以免費下載，再透過玩家出售虛擬貨幣提升遊戲體驗取得收益。

論班底，雲遊保薦行大摩及摩通，大額超購未有上限定價，預水位畀唔夠貨基金上市後在街外掃貨，反之光大保薦的IGG，全配售上市，過去兩日市值與成交比例均高於雲遊，炒味相對較高。結合往績，純搭順風車的話，雲遊秤高啲啲，如果增長維持今年上半年幅度，估值18倍左右。儘管網遊股估值向來有點折讓，但同天價網股比較，看來較易接受。

華新能可逢低收集

末季資金流入新能源股趨勢明顯，看來呢個派對冇咁快完結，不妨繼續在此尋寶。昨日見中國風電（00182）及金風（02208）同升6%、大唐新能源（01798）及華電福新（00816）升3%及2%，華能新能源（00958）配股後股價偏軟，昨逆市跌0.3%，報2.98元，但大行對其盈利前景看法正面，相信股價短期整固過後可繼續向上試高位，3元樓下可逢低收集，下一目標上望3.5元，支持位可參考配股價2.71元。

古勝