日前跟一位基金經理老友茶敍，老友呻港股由六月低位19,426點轉輾回升3,700多點，升幅超乎預期想像，為免「輸人又輸陣」，年結交唔到數，真係追貨都追到氣咳。
此話一出，邢理強心裏嘀咕，六月時市場吹起一片淡風、調低港股預測的為數不少，後來氣氛一轉，自命為Professional的專家急轉口風，「變臉」之快不下於中國國粹，行為類同一般財經知識唔多的散戶，真係老友都無情講。
如何評定一個基金表現，通常會參考Benchmark，即港股基金會參照恒生指數，若當年恒指升一成，該基金升一成一，便叫跑贏。同樣地，若恒指跌一成，基金只跌9%，亦叫跑贏，回報是相對性，不同於講求絕對回報的對沖基金。對沖基金通常會設High Water Mark的高水位條款，即該年回報要高過一定水平才能分成，睇落好似比較公平，但這類基金風險高，基金經理有獎無罰，對投資者到底有幾公平，不妨細味。
追蹤指數的ETF近年大行其道，對組合大部分複製指數，收費又唔平的懶人基金造成衝擊，有口痕友話基金界的黃金時代一去不返，又難怪，投資從來只睇數字，當一個扣除雜費後回報更高的替代產品出現時，殘酷的現實是沒法避得過。
正如一九九四年，一隻名叫Ola的猩猩在瑞典跟五位投資專家一齊揀股，猩猩靠擲飛鏢選組合，結果卻打低所有專家而奪冠，這事件或者只屬一個偶然，但已成為著名投資案例，作為專業財經專家實在應該引以為戒。
邢理強