孖妹S檔案：十月估災 三步攻防

第一步：往績尋啟示 升多過跌

「據數據顯示，若從一八九六年計起，道指於116次十月股市內，有69次升市，47次跌市。港股自一九六四年計起，於49次十月股市內，有35次升市，14次跌市。日本嘅日經指數自一九四九年計起，於64次十月股市內，則有33次升市，31次跌市。由此可見，三大股市嘅十月都係升市次數多過跌市，解釋咗任何股市都會波動，但長遠走勢均是向上升；但若從波幅去睇，十月股市嘅跌幅卻往往大於升幅，這就值得大家留意喇！」

港股關鍵位睇實23600

「若以技術分析去睇，今年十月份美股上下波幅為14,500點至15,800點；港股嘅阻力位則是23,600點，如果無力升至呢個位，恒指則有機會下試21,000點；至於日股則處於對稱三角形通道，意指日經可以爆上或者爆落，上下波幅為13,630至14,500點，但我估佢會先落咗個底然後再升番上去。」

道指自1896年計起歷來10月最大升跌幅

恒指自1964年計起歷來10月最大升跌幅

孖妹：希望港股有力升上23,600點喇，咁我哋就唔使驚股災嘛！

第二步：債彈未拆 搵定路轉倉

「現時環球市場焦點圍繞美國債務違約事件，而17號將會係重要一日，雖然我估計民主共和兩黨最終會傾掂數，但政治嘅變數好難講，如果美國債限炸彈真係爆，咁美股一定跌5%或以上，甚至會令美國再次陷入經濟衰退嘅局面。

港日勝在有政策護航

不過，現時港股以國企股佔多數，恒指升跌受內地經濟影響較多，再者內地經濟穩定落嚟，下月又有三中全會，預料有不少利好經濟政策消息，故即使港股受美股拖累，預計只會跌2%至3%。至於日本股市則有QE（量寬）支持，相信受到波及亦只會跌2%，而且若美國違約風險上升，屆時市場資金將會搵避難所，或會轉投日圓資產懷抱。」

孖妹：中國揸住逾萬億美元債券，真係求神拜佛美國千萬唔好違約呀！

第三步：高息債日股絕地一博

「我相信美國債務上限事件最終可獲解決，因此環球股市出現十月股災嘅可能性非常低。而我唔排除美國解決違約事件後，聯儲局會於十月三十一日宣布退市，現時散戶於十月嘅投資策略可以是逢低必買，但買咩好呢？

我認為大家可揀五年期嘅美元高息企業債券，收益率普遍都有6厘。另外日本除了QE可推動股市，日本首相安倍晉三亦希望將國家退休金基金擴大投資日股及海外資產比例，並於明年四月之前就執行此例，可見日股是目前唯一擁有強大政策支持嘅國家，令我相信日股可持續向好，而散戶則可透過買入日股基金或日股ETF（交易所買賣基金），捕捉當地投資機會。」

A股有望好景到明年

「港股方面，恒指要做好則依賴內地經濟及A股市況帶動，但兩者比較的話，我就較為看好A股前景，估計今年底前滬綜指有望重上2,400點，原因係由十一月開始至明年一、二月，內地均有不少政策會議，相信陸續會有利好經濟政策嘅好消息出台。

另外，農曆新年前後，央行或會放水，甚至於公開市場實行逆回購等，均有助刺激A股上升，散戶可於十月份買入於本港上市而交投量最為活潑嘅A股ETF。」

孖妹：哈哈，如果大家嫌麻煩，其實都可以透過強積金投資組合買入日股基金嘅。

孖妹：既然要從統計科學角度出發，揭破環球市場「十月股災」嘅疑團，因此我哋第一步會出動交通銀行（香港）環球金融市場部首席經濟及策略師羅家聰，由佢施展嚴密嘅統計方法，找出歷年來美股、港股及日股嘅十月爆發股災次數。

第二步則由富亨環球投資顧問財富管理董事陳寶明，拆解三大股市嘅十月經濟狀況。第三步由新鴻基尊尚資本管理投資策略部主管商紹豪提供十月份「進可攻、退可守」嘅投資大法。

若有料報畀高妹同彩兒或有嘢問，可電郵money.biz@opg.com.hk