Market Insight：外圍未穩 慎防調整

事實上，咪以為美國總統真係地球上最有權力的人，近排財政上限爭拗，可見華爾街賓架同債券市場玩家，先係美國總統及國會的幕後老闆。今次順水推舟，用個市去逼共和黨就範，接受奧巴馬的醫改，絕橋也！但全人類相信全球擁有最新最快印鈔機的美國，債務違約僅屬笑話一道的同時，奧巴馬今鋪玩到咁大，個市唔地震都幾難。

今次港股升浪，緣於內地第三季經濟數據有好轉趨勢，但隨住九月份極醜樣的出口數據曝光，估計是今日港股的一大攔路虎。中國九月出口意外地按年跌0.3%，比經濟師預期6至7%增長差一大截，上月通脹按年升3.1%，與國家3.5%通脹目標又走近一步，意味即使第四季出口唔掂，人行投鼠忌器之下，短期貨幣調控可以鬆手的空間有限。

古勝冇點你2013/10/15

萬里長空

創板新股得個睇字

周一A股唔跌，令古勝有點意外，今日港股相信平開甚至開低機會唔細，正所謂十個牛皮九個淡，近期恒指窄幅上落，如果再落番23,000點樓下，要小心個市係時候來一次似樣的調整。

隻雲遊（00484）超購大爆燈，都特登唔用上限定價，留晒水位畀班對沖基金炒短線，果然造就新股市場熱番晒，上周五，六隻新股齊發成為一時佳話。三隻「八字頭」夠晒誇，毅高（08218）收報0.96元比上市價0.6元升60%，御藥堂（08185）唔止變首飾箱，直頭可以變夾萬，以近全日高位2.79元收比上市價1.07元升160%，港深聯合（08181）收2元，更係比上市價0.33元高506%。值得一提，三隻均屬全配售私人派對，一開出第一口價，已比上市價高2.5倍、87%及2.2倍，就算心口有個勇字都未必夠膽跟，總之好睇唔好食，都無謂衝入去做大戶點心。

龍源走勢再現突破

出口數據奇差，今日個市點反應？或者係杞人憂天，古勝就唔多樂觀，仲要估今日有乜股票可炒，確實是9.9分高難度動作。阿里巴巴集團確認唔揀香港上市，祖國網股依然不為所動，睇嚟網股由影子概念，睇住阿里巴巴估值愈估愈高去推動，變咗有少少自動波泡沫。賓架老友話癲到Twitter上市？信唔信自己決定。講到比較實在，兼具故事配合，相信係新能源股。近日大孖沙密密吸風電、光伏及替代能源股，博十一月三中全會有相應扶持政策推出，實行buy on rumor sell on fact。

一時被反壟斷纏繞，一時有國家補貼，對於光電股，在下是恨多於愛，加埋保利協鑫（03800）猶有餘悸，順風光電（01165）亦配股抽水，真係怕咗佢。唔想太冒險揀番業務實實在在，不如睇番經營風場的龍源電力（00916），上周股價啱啱升穿近三個月橫行區高位8.63元，睇番一一年股價曾經在8.5元見頂回落，阻力變支持，可以此為止蝕位，博三中全會前向10元樓上推進。

內地九月份出口增長遜預期，某程度反映貿易夥伴需求依然疲弱，末季阿爺要進一步推動經濟增長，要靠加大刺激內需來實現目標。九月份內地新增人民幣貸款略高於預期，正正顯示人行暗暗加大放水力度以支持市場流動性，相信末季政府投放在基建的資源將有增無減，基建及建材相關股份表現值得關注。

中國建築看高一線

中國建築（03311）在港、澳地區的建築以及在內地的保障房等業務發展均穩步增長，今年新簽合約好可能超標完成，在手總合約足夠未來數年之用，股價有理由繼續跑贏大市，上周五股價升3.3%，收報12.5元，若下周三公布的季度經營數據對辦，股價有望挑戰52周高位13.28元。

古勝