絲絲講場：鄭松興住華南城點會賣？
早排唔少內地公司特別係房企，都想參與香港嘅資本市場，所以周不時都有殼股概念出現，之前民生國際（00938）亦因為控股股東鄭松興同第三方傾緊賣股份都一度炒到慶合合，但最終無成到事。除咗民生，鄭生亦同時都係華南城（01668）嘅大股東兼聯席主席，早排絲絲就同公司CFO馮星航（Stephen）傾開，鄭生會唔會都想賣華南城股份，Stephen就話鄭生對公司嘅工作全情投入，就連住都要住喺深圳華南城咁話，所以睇唔到有咩原因或者迹象佢會賣走股份喎！
內地搞緊多個項目
其實絲絲發現，公司上市之後呢幾年，業務基本上都交畀Stephen主持，絲絲都好耐無見過鄭生，Stephen話，鄭生依家主要喺內地做項目多，仲將好多時間同心血都放晒喺公司，所以有關資本市場嘅嘢幾乎都交晒畀Stephen搞咁話。
依家華南城已經由之前得深圳一個項目，發展到依家全國有六、七個項目，之前公布全年業績仲相當靚仔，雖然鄭生應該唔賣，不過同鄭生一樣係創始股東之一嘅聯席主席馬介璋，喺今年二月就以每股1.55元賣走12.39%，令持股量得番2.29%。不過Stephen話，其實都係好普遍嘅股東買賣，唔會影響公司營運，而包括鄭生在內嘅五位港商創始股東關係亦相當好，相信唔存在不和。
余詩韻