歐豬五國搞到歐洲經濟不景氣，目前唯一可以獨善其身嘅方法就係脫離歐盟。雖然經濟比較好嘅國家例如德國同埋英國成日心思思想退出，但都未有定案。
不過，近日英國就「擺明」要脫歐，絲絲收到風，英國智庫經濟事務研究所（IEA）舉行咗個「英國藍圖」比賽，要參賽者諗計幫國家離開歐盟，如果贏咗仲可以拎到10萬歐元（102萬港元）獎金呀！
絲絲睇過啲詳情啦，要贏102萬港元絕對唔難！事關IEA淨係要求參賽者寫一份2,000字嘅計劃書，佢哋要諗計令國家有序咁退出歐盟，亦要規劃一下英國喺退出歐盟之後要點樣適應新嘅地緣政治同經濟環境。加上參賽者仲可以用個人、團體、學術同顧問機構嘅名義參加比賽，隨時每人寫幾百字就可以搞掂！
絲絲覺得英國要退出歐盟事關重大，簡直同蘇聯解體一樣咁重要呀！就連早前首相卡梅倫都承諾，會喺一七年就退出歐盟進行公民投票，唔怪得連IEA都話，依家係時候諗下英國離開歐盟嘅發展啦！
余詩韻