絲絲講場：致富周老闆投資有棋想

捉圍棋練出大智慧

早排致富證券觀塘分行喬遷，證券行由細變大之餘，致富老闆周松堦更加落重本裝修，佢話：「最緊要係散戶坐得舒舒服服！」

絲絲眼見周老闆經常為證券行忙東忙西，於是追問佢嘅減壓方法，誰知周老闆原來鍾意捉圍棋輕鬆吓。佢解釋：「圍棋係古代四大藝術之一，傳說在堯舜時代已經出現。捉圍棋要考慮防守，又要判斷對手每一次下棋目的，所以圍棋要捉得好，可以提高想像力、邏輯思維、甚至係風險判斷，對投資智慧有好大幫助o架！」

協辦棋賽 首度來港

周老闆深明此道，於是出錢推動本港圍棋文化，早前致富證券聯同香港兒童棋院，贊助兼協辦中國棋院最大型嘅圍棋盛事，更將圍棋甲組聯賽第十輪比賽由內地移師至本港進行。可惜比賽當日周老闆唔得閒出席，但佢就派出致富證券投資銀行部董事陸偉明去監督整個比賽進行。

陸偉明話：「呢個比賽在九九年創立，從來未曾在香港作過賽，而今次難得能在香港舉辦，致富就邀請不少香港家長及小朋友出席，透過觀摩比賽去學習圍棋文化嘅精髓，希望提升本港兒童嘅邏輯思維及冷靜思考能力，藉此提高佢哋嘅投資理財智慧。」

余詩韻