孖妹S檔案：散戶揀魚缸 奄尖過揀股

散戶篇：愛姐：荃灣地膽炒遍12間行

高妹：你身為荃灣區「魚缸地膽」，話時話你收埋幾多個股票戶口先？

愛姐：哈哈！雖然我住葵涌，但就好熟荃灣區啲魚缸！我炒股十五年，現時手上嘅股票戶口有12個，基本上你講得出嘅證券行名稱，我都係佢哋嘅客仔，我時不時就會介紹啲朋友幫佢哋開戶口，好似早排大家都爭住去抽iBond，我都帶咗兩、三個朋友去國浩證券開戶口。有啲魚缸已經搬離荃灣區，所以我都好少用，現時我亦有固定魚缸落腳，但間中都會去其他魚缸幫襯吓，始終要畀面去炒番幾轉嘅！

佣金要平 噪音要少

高妹：12個股票戶口，真係一個月轉坐一間魚缸都得喇，但聽聞你對魚缸嘅整體要求都唔低o架喎！

愛姐：我係唔落行唔安樂嗰啲人，早前黑雨咪搞到港股上午停市，但下午開番市後，我已經即刻衝落魚缸坐！對於我呢啲日日浸魚缸嘅人，對魚缸梗係有高要求喇！第一服務最重要，我係認真炒股嘅人，但又唔識上網落盤，所以魚缸裏面負責落盤嘅人猶如我嘅左右手，佢哋落盤必定要「快、狠、準」；第二就係睇佣金收費，散戶炒股經常出出入入，所以收費要合理；第三睇環境，我就鍾意啲魚缸有區域劃分，唔係話歧視呀，而係有啲散戶真係鍾意吹水，有時太嘈真係影響投資決定o架！

張生：閃電落盤贏錢至緊要

彩兒：張生平時多喺上水區證券行出沒，但我聽街坊講，你坐來坐去都係嗰兩間魚缸，唔算花心！

張生：係呀，我對魚缸無咩特別要求，但我最近都無咩心機落行炒股，一個禮拜先落行兩日左右。早前美國話退市，搞到港股即跌，依家大市浮浮沉沉，港股難炒之餘，亦拖累我啲蟹貨返鄉無期，我想套現又唔得，同時又唔敢拎新錢入市撈貨喎，總之就無眼睇喇！所以我前排都返內地旅行，寧願用啲錢去玩吓。

彩兒：近年唔少證券行劈佣搶客，你無心郁郁去開多幾個股票戶口咩？

縮電腦兼殘舊趕客

張生：講真呀，如果間魚缸嘅落盤速度夠快，服務又正正常常，我炒股贏到錢嘅話，都唔會介意嗰一百幾十蚊佣金啦。好似我之前坐開嗰間魚缸，可能近幾年生意額少咗，於是佢就不斷縮機（電腦），搞到幾個散戶要夾份睇一部機；但縮機都算了，我哋只係快少少按掣去check股價，部電腦已經老化兼走線，咁點炒呀？所以我先至決定轉行。

券商篇：郭家安：唔玩割價靠service留客

高妹：除收費夠競爭力外，貴行有咩「留住客戶的心」嘅妙計？

郭：妙計就係全心全意服務散戶！致富嘅股票佣金為每單刁普通收0.125%，於行內屬於中下價錢，至於炒得量多嘅散戶，佣金仲可以有商量添。講到服務方面，我哋分行同事致力為散戶服務，會親力親為跟進佢哋嘅每單買賣，咁樣先可以了解其倉位狀況，喺適當時候提醒最好嘅出入貨時機。為咗增強新鮮感，公司每隔兩至三年就會翻新證券行環境，以及提升設備質素，等散戶可以喺舒適環境下做投資。

高妹：你哋咁多服務，散戶應該好專一喇？

打好關係唔怕「花心」

郭：其實散戶有兩至三個股票戶口都係正常事，而其中一定有個戶口係屬於銀行的。證券分行嘅用處除了收新客，最重要係可以與散戶保持緊密聯繫，從而建立良好關係，咁樣生意先可以做得長久。雖然旗下分行多達廿間，但面積有大有細，部分位置留畀本身客戶外，分行亦設有流動位，方便新客入內嘗試使用。我認為，要留住客戶的心，佣金平貴倒是其次，有不少散戶根本唔在意佣金貴少少，反而重視證券行嘅服務及同事質素，例如金融產品多元化、落盤速度、市場分析意見等。

致富證券投資銷售部董事 郭家安

張智威：貴精不貴多 收佣靈活

彩兒：信誠旗下證券分行唔算多，會唔會令你哋較難留客？

張：信誠嘅分行策略係貴精不貴多，當部分行家決定展開佣金價格戰時，我哋早已表明立場唔會加入混戰。現時分行營運主要分兩種，一種是經紀需要湊散戶，即需要提供市場上最新最快嘅金融財經消息，亦要給予投資意見；另一種則是不實行經紀制，散戶唔會有人跟身，主要靠自己炒，但每單刁嘅佣金會收平啲。

彩兒：但公司養住一班股票經紀，成本唔會好高咩？

年輕經紀吸後生客

張：經紀會有自己客戶，幫公司搵錢，唔可以話係成本。現時信誠有逾百個經紀，有啲年紀好輕，可以幫公司吸納些後生散戶。其實證券分行最大作用就係收新客，好似iBond熱潮，我哋靠經紀及分行宣傳，都收咗近2,500個新客，所以未來經營策略不會大變。

信誠證券聯席董事 張智威

散戶揀選證券行嘅準則

‧買賣佣金收費要夠平，同時服務要好

‧證券行面積要夠闊落，咁先坐得舒服

‧證券行地點最好坐落旺區，方便交通出入

‧分行經理要有料，可提供大市分析等意見

若有料報畀高妹同彩兒或有嘢問，可電郵money.biz@opg.com.hk