絲絲講場：MT破紀錄 恒生大搞作？
為咗配合業務發展，恒生銀行（00011）每年都會招聘管理培訓生（MT），今次目標人數大約70多人，係歷年最多，比起去年大概多咗七成，睇嚟恒生今年嘅業務有好大發展空間喎！
恒生今年集中為零售銀行及財富管理業務、企業及商業銀行業務、科技及營運，以及財務監理處呢幾個部門請新人，目標人數大約逾70人，絲絲喺度諗，恒生今年請咁多MT，唔通有咩新搞作？
五千申請揀中30人
做臥底就話三年又三年，之但係喺恒生做MT，只要通過三年培訓，就可以做到行政階層，前景路向咁清晰，福利又吸引，工作環境又歡愉，當然吸引到一班莘莘學子嘅青睞，所以競爭都幾激烈㗎！
銀行最講求人才，絲絲知道，恒生以往有好多MT都來自海外及內地著名學府，自去年十月起，恒生就向本地、海外及內地畢業生招手，至今收到約5,000份申請，目前已有逾30位幸運兒被揀中喇！
筆試面試過關斬將
咁又唔好以為入選MT一定要多才多藝，精通多國語言，哈哈，其實應徵者只需要過五關斬六將！首先要經過筆試篩選，入圍後要參與小組面試，包括小組討論、個案研討，又要role play，最後仲要個別面試，接受管理層嘅終極提問。絲絲就等新一批MT出爐啦！
余詩韻