Market Insight：去槓桿化 陣痛難免

伯老幾句說話，美債孳息三扒兩撥挾到2.4厘，返回一一年十月以來最高位。莫非人之將走，其言也善，記得上一任聯儲局主席格林斯潘，都係離任前半年言論特別中肯。今次伯老學到十足十，臨拜拜前（睇怕佢玩埋一月返去教書）為一手炮製的超級寬鬆貨幣政策執手尾，為過度膨脹的投資活動打修正球。

有趣是自去年九月，推出每月買債上限850億美元的QE3時，同時承諾過超低息政策會延續到一五年，會唔會臨尾走數？真係天曉得，雖則話美債同美股對伯老突然實牙實齒講退市反應好鬼大，不過美國聯邦基金利率期貨顯示，一四年底，美元離開0至0.25厘超低息的機會率（即0.5厘以上）由上星期35.4%，升到40.2%，唔算郁得好多。

古勝冇點你 21/06/2013

萬里長空

沽空比例持續高企

昨日港股一跌到底勁插604點，收報20,382點創九個月新低，主板成交在跌市下增至753億元的一個月新高，沽空比例升至15.33%，前晚開始，美、亞、歐股市好似推骨牌陣一樣，死牛一面頸的朋友或者認為，股市反應揭示大部分投資者認定過去一段時間，環球股市做好純粹由QE熱錢帶動，美股經濟谷底復甦，失業率改善遭到忽視。

不過，古勝已經講過睇法，經歷快將四手的美國量寬措施，變相鼓勵借平錢去投資，短期一次規模不少的去槓桿化活動在所難免，昨跌市中就連高防守性的兩電（00002及00006）都錄得與大市接近的跌幅，已可見一二。

美國在經濟恢復元氣下退市，反而不及中國經濟走疲兼水緊咁令人擔心。昨日滙豐中國六月製造業PMI指數預覽值跌到落48.3，遠差過預期的49.1及五月份終值49.2，同50的盛衰界線愈走愈遠。中國要擺脫粗放型經濟，開始重質不重量，對經濟下行容忍度到底有幾大，今次確實係一個艱難考驗！

電力股再跌諗得過

同時間，內地水緊情況浮面，昨日人民幣隔夜及一星期拆息，勁升5.78厘及2.92厘去到13.44厘及11厘，前者創下○六年五月以來最高，唔少企業為出口作對沖的人民幣一年期不交收合約，兌美元昨日隊到落6.3045的三個半月低位，同官方牌價6.1286差距擴大到2.8%，差距更係四年最大，真係愈睇就愈心寒，大行估水緊情況要持續到七月初，個市日日畀淡友借題發揮，六月仲有十幾日，有貨在手的股民真係好難捱。

今年中國TMT股票，多得內地鋪4G網及阿里巴巴集團上市效應，表現一枝獨秀外，其他唔理三七廿一，幾乎都隊到四腳朝天，短期大超賣之後，到底可以買乜？暫時仲係心大心細，如果美國可以控制在2.5%樓下的通脹目標，美債息去到2.4厘或者已把退市可能性，反映得八八九九，高息股或者最多仲有約5%跌幅已差唔多。

領匯（00823）去到36元可以諗諗，其次係電力股，華潤電力（00836）博反彈計劃，暫時同股東大會一齊被押後，睇見華能國際（00902）去到7元左右跌唔落，已有啲手痕，但人係貪心，如未來兩星期有恐慌跌市，穿一穿6.84的250日線就更妙。

煤炭行業整頓需時

內地煤價持續下跌，煤炭股股價亦不知何處是底！中國神華（01088）、兗州煤業（01171）及中煤能源（01898）股價均跌至逾四年低位。在煤炭大省──山西，今年首季煤炭業實現利潤累計完成僅65億元人民幣，同比大降48億元人民幣，跌幅逾六成，同期五大國有煤企中，有三家錄得虧損。

近日有內地傳媒指，近半數煤企處虧損狀態，兩成已瀕臨破產邊緣，行業衰落情況前所未見。但從市場自行調節機制角度出發，大批中小型業者被淘汰出局，暗示行業調整已進入另一階段。正所謂「置諸死地而後生」，不妨繼續冷眼看待煤炭股，直至淘汰賽進入最後階段，即大型煤企之間的重組兼併過後，市場供需重歸平衡，則煤炭股始有望完成長期調整，重踏健康成長之路。

古勝