匯市戰場仲喺日圓同澳元身上，重頭戲已經放係聯儲局議息會上。呢兩個星期周不時都有風放出嚟，例如畀外界視為聯儲局線人嘅《華爾街日報》記者都放晒風話，六月份可能會暗示下退市流程。
無論聯儲局下一步開始停買資產甚至講加息，其實都係經濟向好的訊號，如果聯儲局唔係睇到經濟露出曙光，都唔會收緊貨幣政策，所以聯儲局如果有提退市，相信美金下半年仍然可以睇好。
近日英鎊強勢，一方面係六月份半年結前美元調整，另一方面英國數據亦普遍不俗，例如第一季GDP有0.3%增長，市場憧憬第二季GDP可維持正增長，不過，既然美元大方向上升格局未變，而七月一日又有新央行行長卡尼上任，政策係點其實都未知，所以英鎊升勢其實未穩，上升至1.5750至1.5850相信已經阻力重重，建議1.5750上方可開盤做淡，升穿1.5900止蝕，目標先看回1.5320至1.5370。
GMO CLICK環球通副總裁 陳健豪