絲絲講場：耐世特留存GM血統
內地企業肯請外國人做高管嘅例子唔係好多，最近就有新例，仲係新股嚟添。絲絲喺耐世特（01316）嘅推介會，發現管理層有鬼佬，明明係內地企業點解會有外國人呢？打探之下，原來佢哋係通用汽車（General Motors）嘅老臣子嚟㗎，公關姐姐就同絲絲講，其實公司並唔係內地汽車零件咁簡單，係中資背景嘅環球企業喎。
想當年，呢間耐世特前身叫Jackson, Church & Wilcox，1906年已經成立，其後畀通用汽車收購，仲曾經係GM嘅首個汽車零件製造部門，繼而易名做耐世特汽車，輾轉間就落入中航工業汽車嘅手中。
高管唔少通用老臣
睇番耐世特嘅管理層，原來有唔少係通用汽車嘅老臣子，好似高級副總裁、首席技術及戰略官Michael Richardson，同埋高級副總裁兼及首席財務官Joseph Perkins。Michael喺1974年已經加盟通用汽車，四十年相關經驗，夠晒豐富，至於Joseph九一年加入GM，之後就喺GM旗下嘅汽車零部件業務部門德爾福辦事。另外，仲有其他通用汽車嘅資深員工坐鎮做高管添。
講真之前又有隻汽車股上市撻Q，都惹嚟市場擔心新股虛火，之但係耐世特挾住通用汽車嘅名氣而嚟，可能都會有啲幫助嘅。
余詩韻