○八年雷曼兄弟沉淪，成為環球金融市場嘅標誌時期，大家嘅噩夢由雷曼申請破產就開始，至今仍然有好多被殃及嘅人，活在噩夢中。呢幾年，佢哋嘅資產賣得就賣，絲絲以為雷曼經已喺地球上消失咗，點知上個禮拜一項跑步活動中，就有人專登着晒Tee，提醒世人，佢哋仲未死晒！
早前JP摩根就喺紐約中央公園，舉行咗全長3.6英里嘅挑戰賽，邀請咗紐約市入面好多投資銀行、對沖基金公司參加，但連雷曼都收到邀請，真係諗唔到喎。
當日雷曼一班員工喺起跑線度集合，大家齊齊着住一件印有小說《科學怪人》入面隻怪獸嘅卡通T-shirt，上面仲寫住We're alive！ （我哋仍然生存緊），好似係想提醒其他投行、基金公司，雷曼到今時今日都仲未消失(口架)！
其實依家嘅雷曼公司位於紐約最繁華嘅曼哈頓中城，公司申請咗破產，但仍有一家小型公司繼續營運，人數少少哋，同以前冇得比較，據講係用嚟出售雷曼剩餘嘅資產，過去幾年，佢哋稍為值錢嘅業務都賣晒，應該剩番好少資產。
余詩韻