國家隊匯金入市增持銀行及內險A股，威力卻在H股市場顯現，超賣的港股昨開市見21,007點，即全日最低位後，一路挾上，中午休場前升至21,272點全日高位，之後就牛皮靠穩，下午波幅109點，收21,225點，升256點。
即月期指輕微高開4點後，平倉盤湧出，頭一個鐘已成交逾2萬張期指，佔全日成交張數約三成，收市上升258點，低水95點。
計埋上周五反彈82點，港股兩連升，但成交就一日少過一日，昨日主板成交僅562億元，相比上周四大跌市的八百幾億銀，少咗三成。恒指確實極超賣，經昨日一彈，9日RSI由上周四的14彈上29.9，空軍亦收斂，昨日沽空佔成交比例由12%急跌至8.9%，空襲猛攻後，本周沽空再升逾一成以上的機會減低。
聯儲局本周一連兩日議息，為市場留有大做文章的空間，尤其是伯老說話前言可以跟後語有不同的解讀，增加即市波動，港股跟勢而為，仲要睇埋內地政策風向，短期在區間上落居多，維持小注小炒策略，始終技術反彈的最大原因都係一個平字，彈到咁上下就會有阻力，持好倉者，睇住21,327點反彈阻力，挨近又升唔穿不妨小注試沽。
John Mullen