孖妹S檔案：股海靚冧巴 點先最入腦？

上市公司編號五大謎團

疑問１：上市公司嘅上市編號由港交所決定？

解謎：上市公司嘅上市編號係透過股份代號抽籤計劃所得，而並非由港交所決定或授予。

簡單來說，上市公司可從「普通組股份代號」中抽籤決定股份代號，而呢個組別會有50個代號提供選擇，申請人有兩次抽籤機會，可從抽中代號中二選其一，同時不須繳付任何費用。

疑問２：上市公司捐100萬元就可以自選特別編號？

解謎：港交所提供「股份代號慈善捐款抽籤計劃」，上市公司可從「特別組股份代號」中，抽籤決定股份代號。若採用此方式的話，主板申請人須捐出50萬元作慈善用途，而創業板申請人則須捐出30萬元，抽籤機會僅限一次。

另外，若主板申請人捐出100萬元，而創業板申請人捐出65萬元，則可以不用抽籤，直接從「普通組」及「特別組」的股份代號中，自行挑選喜歡嘅代號。

疑問３：幾時開始呢個制度，善款最終點用？

解謎：若公司想自選股份代號，可參加「股份代號慈善捐款抽籤計劃」，此計劃是港交所於一九九九年十一月及二○○○年六月先後為創業板及主板引入，所得款項現時全數撥捐畀公益金，港交所從中並無收取任何費用。公益金為政府認可法團，旗下受惠機構總數達150間，相信計劃所得善款已能惠及不同類型嘅受助人士。

疑問４：上市編號本身暗藏組別分類？

解謎：證券代號是根據證券代號編配計劃去作分類，例如主板及創業板上市證券會使用00001至09999之間代號；窩輪用10000至29999之間代號；牛熊證用60000至69999之間代號。

至於以人民幣買賣嘅產品則使用80000至89999之間嘅代號。其他詳細分類可參考港交所網頁。

疑問５：上市編號若要重複被使用，需經「過冷河」時間？

解謎：股本證券於除牌以後至少十二個月，其股份代號不會被其他證券重用，至於窩輪、牛熊證及債務證券到期後，其股份代號則最少保留三個月而不會被重用。而在這段期間之後，有關股份代號會被重用嘅時間，則視乎需求情況而定。

註：以上解謎資料由港交所發言人提供

那些年的難忘數字故事

耀才證券市務總監 郭思治

高妹：諗諗吓，上市公司捐錢畀公益金，可以獲得心儀嘅冧巴，又可以做善事，果然是一「捐」兩得。

郭：所以耀才上市時都捐咗100萬出嚟，揀咗「1428」做上市冧巴，「一世易發」夠晒好意頭之餘，亦非常易記入腦，不少散戶聽到呢個冧巴都好開心o架！

彩兒：但我反而想知道「那些年」的上市冧巴故事，郭SIR身為股壇資深前輩，實知道唔少秘聞？

郭：秘聞就唔知喇！但能夠獲得較前編號嘅上市公司，通常都係市值百億或千億以上嘅巨企，可想而知呢組編號幾靚幾難得呀！但我記憶最深刻嘅上市公司，始終都係想當年嘅香港置地（當時上市編號為00007）及怡和集團（當時上市編號為00015），前者有「中環地王」之稱，後者則是當年香港三大英資洋行之一，好巴閉o架！可惜其後呢兩間上市公司都先後取消在港上市地位，冧巴由另外兩間公司攞咗。所以話，往事只能回味。

高妹：原來如此！咁有無一隻上市冧巴係逢炒必贏錢o架？

郭：嘩！我知道就好喇！如果你睇番往績，咁騰訊（00700）都係一隻贏錢股，其股價自上市至今可謂扶搖直上，在不少大市波浪中仍可屢創高位，算是十分難得。

彩兒：勢估唔到原來「700」先係當旺數字！不過「好意頭」之事，信則有不信則無，好似本地名牌時裝店I.T就用咗求救熱線號碼「999」作為上市編號，至於超級不祥嘅「444」一樣有人願意採用，就係Sincere Watch HK，呢隻股份勁到連中文名都無，真係唔驚散戶將佢忘記，可見該股果然夠吉士又夠威風呀！

高妹、彩兒

若有料報畀高妹同彩兒或有嘢問，可電郵money.biz@opg.com.hk