絲絲講場：Google搞創業女聯盟
Google日前宣布與Entrepreneurs Club同埋General Assembly合作，推出本港女創業家網上聯盟計劃，絲絲亦獲邀到場，除咗話支持呢次盛事外，仲同先施百貨後人兼Prestique公關公司創辦人馬天惠（Esther）等一眾姊妹交流吓創業心得添。
Google公共關係及政府關係高級總監Susan Pointer致詞時就指，小型企業佔本港經濟份額達九成九，但充分利用互聯網嘅企業家就少於一半，另一方面○九年有調查指本港企業家嘅男女比例高達4:1，所以希望透過聯盟嘅成立提高女創業家嘅互聯網意識。嚟緊聯盟就會陸續推出一系列嘅工作坊同埋社交活動，畀各位成員實習點樣擴充業務同埋彼此交流。
馬天惠分享創業路
講到創業大家都知道唔簡單，恐怕只有過來人最清楚。Esther就講番佢十幾年前開展生意嘅經驗，話當時有三大難關，首先難在請唔到啱嘅人幫手，之後要靠自己主動出擊，重新建立自己嘅客戶群，最後當然唔少得頂住屋企人畀嘅壓力。
至於咁多年嚟累積到嘅體會，佢就話創業一定要時時刻刻保持住熱情，另外仲要有恒心，同埋遇到機會要主動出擊，以及時時畀到客戶親切感，而最後就係唔好忘記參與慈善回饋社會。
余詩韻