美國波士頓嘅馬拉松爆炸案，係由兩個土製「壓力煲炸彈」造成，呢個兇器壓力煲，證實係西班牙家庭電器品牌Fagor嘅產品。好彩「冤有頭債有主」，Fagor擺明係無辜捲入事件嘅，所以品牌聲譽冇受影響。
Fagor逃得過波士頓爆炸案呢一劫，之但係佢依家嘅情況一樣係咁水深火熱。一切源於西班牙爆發債務危機，當地銀行收緊借貸，搞到Fagor都面臨財政危機，仲要周圍撲錢，急住籌六千萬歐元償還債務呀。Fagor唔單止要盡快拆除眼前呢個債務炸彈，其實自○八年爆發歐債危機，西班牙經濟愈嚟愈差，當地家庭用品市場更加萎縮咗超過五成。
可能大家對Fagor呢個西班牙家庭電器品牌比較陌生，Fagor喺一九五六年成立，一年平均生產超過七百萬部家庭電器，喺西班牙、法國、意大利、中國設有廠房，平均一個Fagor煲都賣成140美元。而Fagor喺美國都係其中一個出名嘅家電品牌，一年都賣到約二十萬個煲，佔當地四成市場。
余詩韻