絲絲講場：告別港交所 夏佳理鬆哂

夏佳理在任七年，曾經歷過○八年國際金融海嘯，咁佢當時有冇瞓唔着呀？佢話金融海嘯發生至今，全球經濟仍然唔穩定，歐洲各國嘅失業率仍然高企，宏觀經濟仍有好大挑戰。

環球動盪 吸外企受挫

佢任內最為人津津樂道可算係瞓身推廣海外公司來港上市，不過，呢個計劃好似「有頭威，無尾陣」，近年更加係「斷晒纜」咁！佢就話經濟同市況都有影響，好多美國同歐洲公司，個別行業增長都有疑問，未必覺得依家上市係合適，但佢相信港交所同事仍會繼續吸引海外公司來上市。

乘人之危 sell數據中心

夏佳理告別港交所，「新貴」梁高美懿尋日未有現身，但港交所今日召開新一屆董事局會議，估計「梁高」應會亮相。

另外，早前電盈上環數據中心出現故障，影響部分經紀行，港交所就趁機喺五月搞研討會，推廣吓自己個數據中心，果然識做生意喎！

照咁計，港交所股東應該好開心，不過，佢哋就冇理咁多，尋日股東會一於「搶飲品」先，實情唔會執輸！

余詩韻