Market Insight：券商股 慢火煎魚

近期蘋果公司股價由700美元撻落400美元，華爾街開始流傳教主接班人庫克CEO張櫈唔坐得幾耐，睇今次出到巨額股息做掩口費，博班芬佬高抬貴手，謠言唔似空穴來風。股神巴菲特以前為巴郡（BRK）唔肯派息，因為佢有更佳idea，幫股東爭取更好投資回報，從蘋果公司轉性大派息，正標誌高增長期完結，步入穩定期的事實。

芬佬對港股興趣增

昨日港股跟外圍反彈，仲將周二因滙豐中國製造業PMI大失所望的傷害，一次過收復過來，恒指升376點報22,183點，一、二月港股都係先高後低，今個月仲有四個交易日，如果埋單恒指能夠重返22,299點樓上，將可避免三連跌的頹勢。

古勝冇點你

萬里長空

近兩三個月，港股持續沉淪，完全無理會歐美股市的強勢，反而近日美股高位轉趨牛皮，基金對港股興趣反而有增無減，除非美股有閃跌情況出現，以中港兩地股市估值處於歷史區間下限的客觀環境下，五月股市實在唔需要太淡。

其實，近期整體大市升跌股份比例，已明顯比四月初及四月中有所改善。上周五及昨日，上升股份比例分別升至75%及71%高水平，昨日創52周新高股份，達43隻之多。

近期電訊設備、受惠於一孩政策的童裝及奶粉股、REITs以及電力股等都處強勢，炒股唔炒市的趨勢十分明顯。查實恒指成分股內，內銀受制於人行持續調整貨幣政策，由寬鬆轉回中性的舉動，加上中銀監嚴管理財產品，暫時缺乏條件炒上，本地地產股在連環辣招令樓市價量齊跌後，估值平都冇故事配合，加埋兩隻指數重磅股，中移（00941）季績唔好，滙控（00005）營運數據持續唔達標，芬佬當睇少隻。數數這堆股份佔恒指比重唔細，卻同時欠缺動力，形成指數表現拉牛上樹，非成分股卻是各自各精彩的兩極化局面。

業績見底復甦可期

如果睇個市氣氛好番，券商股係肯定可以受惠的板塊之一，事實上，內地券商的一二年業績差強人意，也是○六年以來最低迷的一年，差無可差，當然也可看成未來復甦空間大的樂觀意願。不過，由已公布首季業績的A股券商，業績因為A股成交及指數強勁反彈，有相當可觀升幅，反之，兩隻內地券商股中信証券（06030）及海通證券（06837），儘管上周五因為A股可能納入大摩MSCI指數的消息刺激而急升，可是相對二月份高位，目前股價仍然累積回落逾兩成之多，短炒值博率其實唔錯。

綜合大行預測，中信証券今明兩年核心盈利會從一二年谷底，按年回升51.1%及26.8%，海通則升44.6%及20%，現價16.92元及10.74元，一四年市盈率將回到18.5倍及15.6倍，低於歷史估值。券商是少數業績幾近見底的板塊，除非內地經濟真係衰到硬着陸，或者滬綜指跌穿2,000點關口，橫睇豎睇，未來三至六個月券商股向上的機會，點都大過向下。

呢期乳品股表現明顯跑贏大市，其中合生元（01112）股價迭創新高唔在講，雅士利（01230）股價昨日急升7%，收報3.02元。另外，蒙牛乳業（02319）證實就收購現代牧業（01117）若干資產進行非正式談論，強調該等談論只屬非常初步，但兩股均高收。

蒙牛前景值得睇好

講開蒙牛，近年積極拓展上游業務，現代牧業既為其原奶主要供應商，難怪市場一直憧憬二者有整合資產的契機。另一方面，自中糧集團入主後，蒙牛亦積極整合資源，全面提升內部嘅生產水平，相信未來效益可以逐步體現，中長線前景值得睇好。

古勝