絲絲啱啱睇完由上投摩根嘅投資風向標報告，內容係比併北京、上海、廣州三地人首季投資表現，好消息係近八成投資者都賺錢，其中北京人表現最叻，超過八成投資者都賺到錢，但上海投資者就慘啲，近三成人都話蝕錢，廣州就夾喺北京同上海中間，八成人賺錢兩成人蝕錢。
報告話，三地合共有超過三成投資者投資股票、基金、銀行理財產品等比較傳統嘅投資產品，投資股票嘅多過五成，廣州嘅更有逾六成炒股添。報告話，廣州投資者係三地裏面最具自信，投資經驗最豐富，接近一半受訪者都唔使搵專業人士幫手，自己一個搞得掂。北京人偏好投資國債，而且佢哋有超過六成受訪者都要搵人問投資建議。
至於咩行業嘅投資者最賺錢？竟然係從事交通同倉儲行業嘅投資者賺錢最多，平均回報率4.2%，跟住係做freelance嘅投資者，整體回報率約4%。反而公務員投資能力係十個受訪行業入面最低，佢哋平均回報率只有1.3%，仲差過回報率有2.3%嘅家庭主婦，爆冷墊底，結果令人意外，唔知係咪驚畀人話利益輸送，故此報細數。