絲絲講場：鐵娘子手袋掀搶購潮

英國高級手袋品牌Launer話，戴卓爾夫人生前最愛品牌嘅兩個手袋系列Bellini和Adagio，銷量最近急增五成，而戴卓爾夫人死訊公布當日下晝同埋葬禮舉行嘅朝早，兩款手袋去貨仲去得特別快添。

Launer贈袋成個人標誌

講起戴卓爾夫人嘅經典造型，不得不提同佢形影不離嘅招牌黑色手袋。

Launer手袋係英女王伊利沙伯二世御用嘅手袋品牌，款式設計簡潔，一拎起佢哋嘅手袋，自不然散發出女性獨有嘅尊嚴，唔怪之得深得戴卓爾夫人嘅歡心。

戴卓爾夫人係八○年代開始拎Launer手袋，Launer行政總裁Gerald Bodmer有次喺報紙睇到一幅戴卓爾夫人拎住個低調手袋嘅漫畫，佢覺得自己品牌嘅手袋好襯同好適合戴卓爾夫人，就主動送咗個手袋畀戴卓爾夫人。

而呢個手袋仲係戴卓爾夫人第一個Launer手袋添。之後唔使絲絲講，大家都知嗰款手袋更加成為「鐵娘子」標誌造型嘅一部分啦。