絲絲講場：鍾楚義太太「掃清」The Hampton
香港豪宅用地買少見少，唔少發展商都惜貨如金。好似資本策略地產（00497）旗下首個跑馬地豪宅項目The Hampton賣到最後一個單位，都「肥水不流別人田」，以主席鍾楚義嘅老婆簡淑妍名義買入，唔知係咪鍾主席買畀太太嘅禮物。
話說回來，鍾太其實來頭亦唔小o架，佢係本港著名測量師簡福貽嘅女，以佢嘅財力，即使買豪宅亦綽綽有餘，鍾太只係平日作風低調，養尊處優，而佢細佬簡士民亦喺資本策略地產做執董。
最後一伙 估為投資
講番今次單交易，鍾太買嘅係藍塘道The Hampton 1樓A室及地下第4同第5號車位，面積有2,700呎，總共價值8,680萬元。絲絲估計鍾太係買嚟投資，雖然依家樓市氣氛係差啲，但豪宅位置唔錯，等吓再善價而沽，亦未嘗不可！