近年好多上市公司嘅股東會，都有股東埋怨茶點安排唔好，絲絲尋日去過恒隆集團（00010）同恒隆地產（00101）嘅股東會，發現佢哋都順應股東意見，將每位股東享用嘅點心由六件提升至九件。
絲絲聽恒隆老友講，有股東曾經表示安排畀佢哋嘅點心唔夠，所以今年恒隆就準備好晒，大幅增加點心數量，睇嚟佢哋都好聽股東意見喎。如果年年有得加，至少跟通脹，咁就更好喇。
除咗點心數量有增長，恒隆舊年起已改喺中環寫字樓以外嘅哋方搞股東會，老友話，原因係恒隆嘅股東已經愈嚟愈多，所以要轉去更大嘅場地，今年就揀咗金鐘一間五星級大酒店開股東會，地方夠晒大，交通又方便，啱晒班股東參加咁話。
不過，股東最關心嘅，唔係點心數量。喺股東會上，有股東問恒隆老細陳啟宗，旗下跑馬地藍塘道啲單位會唔會減價賣快啲，佢反問在場其他股東點睇，大家當然唔贊成，佢冇講會唔會減價，但恒隆一向對旗下樓盤咁惜售，睇嚟唔減居多！