李寧（02331）前CFO鍾奕祺喺舊年十月辭任，公司足足用咗半年時間，至搵到合適人選填番掌櫃個位，李寧舊年盤數見紅，唔知同CFO個位空咗有冇關係。新掌櫃曾華鋒（Terence）曾任職美國著名時裝集團Guess、美國高爾夫及休閒服品牌Ashworth及美國牛仔褲大哥Levi Strauss。
李寧喺半年前已預告，搵到合適CFO人選前，過渡期內將有一名曾任跨國企業中國區首席財務官、具多年營運經驗顧問，將協助領導公司財務職能。而尋日公司就表示，曾効力多個美國零售品牌嘅Terence，喺過去51年嘅人生生涯中，超過23年都係効力服裝界，亦曾擔任多項管理職務，包括首席財務官、首席營運官、亞洲區域總裁及高級業務副總裁等。
其實，不少行內朋友都有聽過Terence Tsang嘅大名，○七至○八年Guess旗下中、港分店開幕時，Terence早以亞洲區總裁等身份亮相。當一○年Levi's推出新品牌dENiZEN時，大家先發現Terence原來已轉會。不過，估唔到今次Terence咁突破，回歸國產品牌懷抱。
Terence腳頭唔錯，李寧尋晚公布，年頭公開發售的可換股證券認購額達46.86億元，較提呈發售本額18.47億元超購2.54倍。
余詩韻