Market Insight：水泥旺季有望轉勢

這隻以販賣創意的科技股巨擘，七個月前股價創過697.8美元新高，市值達6550億美元（5.1萬億港元）登上史上最大市值公司，估唔到半年多過後，市值蒸發超過四成。蘋果公司被大孖沙遺棄，表面解讀係隔晚券商Piper Jaffray分析師Gene Munster一份報告，預測九月份發布會上，蘋果公司將推出低價智慧手機，搶本身高檔iPhone生意，可能出現自己打自己情況，最壞打算係流失三分之一的高端用戶。此外，有供應鏈消息話零部件訂單顯示，iPad mini本季出貨量會遠差過市場估計，可能要跌兩至三成。

查實生活同投資息息相關，港人玩手機在全世界出名最新最快，單係睇睇公眾交通工具上面，身邊多少人轉投Android懷抱，以及全球最大蘋果產品交易廣場「先達」的炒價及回收價，或多或少感受到蘋果公司失去頂上光環的情況。

放大圖片

放大圖片

外商投資興趣回升

古勝嘅手機也只是停留在4S未有升級，貪其外觀純粹係個人感覺，但其實上吓網，用社交網站睇睇新聞影吓相，大部分智能手機已經綽綽有餘，想要像二○○一年推iPod，或○七年推第一代iPhone，有驚天地泣鬼神的產品重新領導市場，以Google的Android漸站穩陣腳，市佔率與IOS已經平分秋色，看來只是投資者過分奢望而已。

蘋果公司今年PE9.1倍，而港股係12倍，歷史估值比較一啲都唔貴，不過投資市場寸土必爭，至唔好sell就係增長放緩故事，港股攞脫唔到弱勢，出現五連跌，昨日恒指再插57點收報21,512點，主板成交縮到得544億元，升跌股份數目六四比，反映市場買賣兩閒，資金極選擇性，走勢較佳有家電股、REITs嘅泓富產業（00808）及越秀房託（00405）、內房股及幾隻紡織股。

早市商務部公布，三月份內地外商直接投資（FDI）為124.21億美元，按年升5.65%，稍低於二月的6.3%，但比分析員估計的1.9%高近三倍，亦係去年六月以後，連續兩個月出現正數，外商重投內地投資興趣回升，滬綜指亦因此拗腰升3點報2,197點。

中國公布「國五條」細則前，三月份70個大中城市新建住宅售價，按年升幅擴大到3.6%，上漲城市有68個，比二月數字多兩個。查實多年經濟高速增長，民間滾存的財富無太多出路，唔少人對股市死心，加上中國人唔少抱住要有瓦遮頭的傳統，中央調控房價多年，結果愈調愈升，睇嚟國五條最多只能減慢樓市上升速度。

龍頭股海螺稍秤先

內房股之外，近期多間大行都積極向客戶推介水泥股，一來見樓市未有並無畀國五條一招KO，加上商品房的需求，以及三月傳統需求回升，水泥價同首季比較有唔錯升幅，而且，另外市場消息話，中國城鎮化工作會議短期會進入實質啟動程度，都有利水泥股，有機會繼內房後出現火燒冷灶炒落後的情況。

龍頭股之一的安徽海螺（00914）二十二日會出季度業績，估計按年會跌15%，惟第二季基建需求帶動下，大行估計毛利率及銷售量都由首季低位反彈，可以睇高一線。至於另一龍頭中國建材（03323），則較能受惠於西部較高的水泥價格，兩股技術走勢，以海螺個半月以來首次企穩50日線樓上收市，短線較可取，值得留意。

航空股候低位入貨

呢期金價大跌，引發商品市場大幅震盪，國際油價回落理論上利好航空股，加埋最近人仔兌美元匯率升值，中資航空股應該算係受惠者。但見到國航（00753）、東航（00670）及南航（01055）股價反彈力度依然有限，皆因內地經濟增長持續放慢，對客運及貨運量需求添上不明朗因素，加上次季受H7N9疫情打擊，足以抵銷利好因素。

不過，站喺中長線角度，每次流感疫情爆發，都係低吸航空股嘅機會，季內不妨耐心等候低位出現，再見機行事。

古勝