絲絲講場：上石發完盈喜又要救火
上海石化（00338）幾經辛苦，終於省番靚份業績，啱啱係前日發盈喜，估計今年第一季扭虧賺1.7億人民幣。以為可以鬆番啖氣，點知尋日公司有座煉廠就畀祝融光顧。好彩火災無造成傷亡，只係連累尋日股價升少咗好多！
累股價升少一截
今次發生火災嘅據講係一座渣油加氫裂化裝置，專門將重質嘅渣油加工做運輸燃料，年產能390萬噸，尋日下晝兩點鐘起火。場火雖然撲熄咗，不過間廠就要暫時關閉，廠方嘅發言人就話，仲未知間廠幾時可以重開！本來公司啱啱發完盈喜，尋日上晝股價不知升得幾靚，最多升近6個巴仙，下晝場火就唔夠通氣，搞到收市升唔到2個巴仙。
成品油價格倒掛問題一直困擾石化股，上海石化舊年嘅業績認真無運行，蝕成超過15億人民幣。到咗今年第一季成功扭虧，可謂有個好開始，轉頭就發生場火災，搞到有裝置要停產，都真係幾無癮o架！希望間廠可以盡快復工，唔會再打擊上海石化嘅業績就好啦！