絲絲講場：稻香破格升職見Board
傳統中餐行業一向係實行師傅教授徒弟嗰套，業界成日有聲音話要上位就要識擦鞋、識「埋堆」，但唔代表有能力、有實力，故常為人所詬病。
稻香（00573）就話要打破傳統，要上位升職，就必須過三關：筆試、面試、實習，不過只係限於分店主管級別，絲絲覺得有系統嘅管理無疑係好，但真係估唔到做餐飲都要考試囉。
「競聘上崗」優化管理
稻香一向都有好多理念，較為人熟悉嘅係「三優管理」、「五常法」等，原來除咗營運上，佢哋連員工晉升都自有一套，稱為「競聘上崗」。尋日絲絲同稻香行政總裁梁耀進傾開，講到佢哋嚟緊會大力拓展內地市場，所以對員工質素、管理工作都好有要求，佢就透露話員工「見board」升職，並唔係一件易事。
筆試面試仲要實習
過五關斬六將？咁又唔使，但最少要過三關，分別係筆試、面試、同埋實習。聽講有員工仲考咗7次，真係有恒心、有毅力，值得嘉許。中港兩地都愈來愈難請人，所以公司都會鼓勵員工「升呢」，因為依家唔可以再單靠打關係上位，而係要有實力、有經驗，而呢套考試喺中港分店都會應用，希望可以改革行業傳統晉升之路，提供有質素嘅服務啦。