孖妹S檔案：4段魚缸情緣

股壇才俊配財經公關

鄧：AMTD證券及財富管理業務部總經理鄧聲興（Kenny）

彩兒：Kenny，你深受師奶股民愛戴，是「魚缸」裏的風雲人物，當年怎樣娶得美人歸？

散戶郭生（左）婚後投資趨保守，炒輪僅投放兩成資金。	散戶嬌姐（左）同老公各有各炒股，但就絕對唔會傷和氣。	耀才黃越（右）相信老公眼光，近期投資於黃金市場甚有斬獲。

　鄧：當時Maggie係財經公關，我們因工作而認識，起初並不是一見鍾情，只係有好感，後來慢慢熟落，先至正式拍拖！哈哈，其實我並不浪漫，到依家都未送過花，總覺得又貴又唔實際！

彩兒：幾百蚊對你來說濕濕碎啦！咁Maggie依家做緊咩？忙嗎？

　鄧：現時她與朋友開公司，主要幫企業搞IPO的video製作，但好難講忙唔忙，如去年IPO市場淡靜，佢會較為得閒，而今年多咗公司搞上市，難免會忙好多！

彩兒：咁你咪可以快啲知道有關IPO的消息？

　鄧：市場消息仲快呀，所以佢知嘅嘢我都知啦！

彩兒：你太太有冇投資？

　鄧：她主要買基金做長線投資，由我幫佢設計基金組合，現時投資緊中國及金磚四國市場，因中國的經濟發展穩定，企業的盈利表現甚佳，加上A股估值吸引，長遠可帶動基金回報，惟金磚四國的投資潛力減退，現正考慮轉至日本市場。儘管日本經濟裹足不前，歸根究柢係通縮累事，以致企業不願花錢投資。假若新政府能夠坐穩，持續透過貨幣政策改善通縮，日股前景便可看高一線。

彩兒：人家常說廿四孝老公會把財政大權交由老婆負責，你係唔係呀？

　鄧：哈哈，我哋財政獨立，不過我每月都會畀家用，由太太做家裏的會計師，負責家中的使費支出。

券行認外母變真女婿

郭：散戶郭生

彩兒：聽講你喺證券行認外母，後來才結識老婆喎！

　郭：哈哈，我當初見靚姐好傾，咪認佢做外母囉，起初都係講笑，點知後來識咗佢個女仲結埋婚，依家真係變咗外母！

彩兒：嘩，真有緣！咁你老婆有冇炒股？

　郭：老婆唔識炒股o架，由於她對投資的概念不大，現靠外母幫佢投資。

彩兒：點解唔直接交畀你幫佢投資？

　郭：我投資太進取啦，佢交由外母負責會安全啲！我偏好炒窩輪，但家陣已愈來愈難炒，現要快買快沽才有獲利機會，不像○七、○八年時可一次過買數百萬股博鋪勁！

彩兒：你的收入主要來自股市，但你炒輪風險咁高，老婆會否擔心？

　郭：她冇意見呀，因佢識我嗰時，我已全職炒股，不過婚後投資取態轉趨保守！以前會攞七成資金去炒輪，依家就僅投放兩成，其餘會分散至物業、商舖，以減炒賣風險！

夫妻炒股長短各精彩

嬌：散戶嬌姐

高妹：嬌姐，我成日都聽到你同老公傾電話，你哋結婚廿五年仍恩愛如昔，真令人羨慕！

　嬌：我老公平時要返工，佢靠我幫佢落盤，所以我哋咪經常通電囉！近排市況好難玩，明明年頭市況仍然暢旺，踏入三月就跌番轉頭，年內恒指跌咗2.39%呀，惟有靠後市去收回失地，暫時看好能源股，因內地的能源需求龐大，相關股份有不俗的升值潛力。

高妹：你哋會否一齊研究大市走勢呀？

　嬌：我哋啲玩法唔同，老公會睇長線，仲會做功課去研究公司業績及派息策略，但我就玩即市，主要留意熱炒板塊，賺少少就會沽貨獲利。其實老公睇市會叻過我，他對港股走勢樂觀，料年內恒指可受內地經濟帶動而升至24,000點。

高妹：有冇試過因炒股而影響感情？

　嬌：冇呀，我哋各炒各的，最多會因冇聽對方意見而呻笨，但就唔會因此而嘈交，話到尾「錢財乃身外物」！

開會碰面歸途結良緣

黃：耀才證券銷售及客戶服務部經理 黃越

高妹：你一副幸福少奶奶的模樣，你老公實好錫你啦！佢以前點追你？

　黃：我睇中環分行，Ryan就負責元朗分行，看似風馬牛不相及，但我哋每周開會都能碰面，之後就會同其他分行經理一齊食飯。以前我住喺深圳，每天要在九點半前趕搭中環的過境巴士，否則要改經屯門到深圳灣，恰巧與Ryan同路，所以他每每拖延至九點半後才散band，藉此製造二人的獨處時間囉！

高妹：你哋會否交換工作意見？

　黃：元朗分行的風格與中環分行相當不同。元朗以街坊客為主，散戶間會相互交換意見，現場氣氛相當熱鬧，相反中環的股民有自己一套的炒股策略，多作獨立分析及思考，所以我們的做法各異。

高妹：你們的投資策略相近嗎？

　黃：Ryan相對會睇得較長線。當我們對大市看法不一時，難免會有爭拗，但其實我好相信Ryan的市場觸覺，我們二人共有一筆不多於一百萬元的資金用作炒金，全由他決定策略方向！如早前傳言美國加息，立刻刺激資金流向金市避險，但當伯南克澄清維持現狀時，金價又再走弱。因此要在金市獲利難度甚高，好彩Ryan判斷幾準，今年賺咗15%。

高妹：婚後的理財態度有冇改變？

　黃：我們會把部分收入存入聯名戶口，以作每月供樓之用，同時繳交生活雜費。坦白講，我冇乜金錢概念，曾試過碌爆卡，但婚後是二人生活．總要考慮另一半的感受，所以現時理財會較為審慎。

高妹、彩兒

若有料報畀高妹同彩兒或有嘢問，可電郵money.biz@opg.com.hk