今個禮拜一開局就風聲鶴唳，上個星期啲地產發展股就率先因為有銀行帶頭提高新造按揭利率而腳軟。加息陰霾再加上歐債問題重提，令到大市唔見咗幾個巴仙，收租股變成避險工具。除咗揀一啲傳統收租股外，資金（尤其是避險嗰啲）亦相繼湧入房地產信託基金（REITs）。好似領匯（00823）咁，一路喺高位徘徊。
領匯擁有龐大物業網絡，自上市以來，佢嘅年度複式回報就高達23.3%，包括單位分派同股價增長。領匯旗下物業都係以日用品零售市場方面為主，呢類市場最大特色就係抗經濟周期。如果香港市道仍然健康，對日用品零售市場嘅影響就唔會好大，最多只係增長會放緩番啲。不過，Prof. J睇租務情況都係會平穩發展。
領匯亦逐步幫佢嘅資產組合推行資產提升工程，令物業租金收入上升。呢啲工程以改善間隔布局、人流通道及調整商戶組合為重點，為租戶同顧客營造更理想嘅營商及購物環境。截至去年九月底止，負債比率只有14.9%，流動資金流充裕，屬於健康嘅財務狀況。穩健嘅財務狀況容許除咗現有物業外，繼續物色其他收購項目以分散風險，務求產生更多協同效應同經濟效益。
以昨日收市價計，領匯息率仲有3.4%，而市場氣氛開始悲觀，如換股，可揀一啲防守性較高嘅。繼續追蹤，出發！
香港大學電子金融服務榮譽助理教授 徐燦傑