絲絲講場：永隆請客品紅歎名酒

永隆銀行今年八十周年，不斷搞活動慶祝，佢哋私人財富管理趁好日子搞紅酒會氹貴客，請埋法國波爾多名酒莊Pontet Canet莊主嚟香港，同客戶一齊品紅。呢間酒莊○九年拎咗酒評家Robert Parker100分嘅出品，仲威過五大酒莊嘅Lafite同武當。

永隆開咗唔係好耐嘅私人財富管理中心，仲有埋紅酒貸款，搞品紅活動可以話係一條龍咁慶祝，似足永隆管理層掛喺口邊啲一條龍式服務。絲絲聽講佢哋副總經理張東同私人財富管理主管趙慧玲（Venus）都有一齊出席呢個「Pontet Canet 100分的大師班約會」。

絲絲見到當晚Pontet Canet莊主Melanie Tesseron，揀咗6款出色年份嘅Pontet Canet佳釀，其中一款就係聞名嘅○九年出品。

喺Robert Parker手上拎100滿分有幾難？絲絲記得當年得18支紅酒拎到，你話幾咁威，仲列為○九年「Magic 20」，即係當年最好嗰20支酒之一添。