尋日「輪界」都算多事，繼有荷合退出輪證市場，又有法巴輪后趙海珠唔做。「合久必分」可以話係金融界嘅常態，趙海珠喺法巴做咗6年幾，尋日剛辭任法巴上市衍生產品部聯席董事一職。自從年頭誕下龍仔後，佢本嚟今日應該放完產假返工，但佢尋日朝早就遞咗辭職信，引起行內一陣討論。
據悉尋日佢已正式離任，絲絲同佢傾過，佢就話根據行規，遞信後可以即日唔使返公司，但就要有3個月過冷河嘅時間。剛為人母嘅佢話BB已經有兩個月大，而且仲大得好快，已經有14磅重。咁辭職係咪想專心做全職媽咪？佢就解釋話唔係，純粹因為已經喺法巴做咗6年幾，加上小朋友又啱啱出世，所以都想休息一排，同埋轉吓新嘅工作環境。
佢仲話嚟緊會透過獵頭公司等搵工，至於會唔會重返新聞主播界，佢就話傳媒行業唔係佢嘅首選，最好都係做番金融業。
雖然法巴無咗一位「生招牌」，但法巴上市衍生產品部董事郭小菱就話，珠珠放咗產假有一段時間，工作都係照樣咁做，相信影響唔大。其實從主播到輪后，每一步都見證咗珠珠勇於挑戰嘅性格，雖然嚟緊未必再喺螢幕前見到佢，但絲絲都喺度祝佢有更好嘅發展！
余絲韻