Market Insight：內房調控沽壓未消

巴達迪斯的世界排名唔高，但試過發老脾一場波打爛四塊球拍，成為新聞，估唔到塞浦路斯政府一樣咁激，史無前例向銀行存戶徵收存款稅，為的是區區76億美元，以補充銀行資本。不過，就係呢單消息，昨日港股市值唔見咗超過600億美元。塞浦路斯GDP規模，排在歐元區尾三，相當於歐元區經濟比例0.18%左右，見昨日港股大插水之後，歐洲有骨牌式下跌的趨勢。

股市反應咁大，講到底，面前希臘遲遲滿足唔到得到歐盟援助的條件，意大利政府懸空，西班牙仲係管治醜聞的泥漿之中，一旦有樣學樣發窮惡，火燒連環船就大煲。

試想有晚，如果政府要求銀行限制匯走資金，同時向存戶徵收撳住搶，徵收3至15%存款額作稅金（視乎資金大小而定，提議中超過50萬歐元徵收15%！），真係唔擠提就有鬼。

放大圖片

放大圖片

淡友暫佔盡上風

昨日消息一出，塞國市民群情洶湧之外，最大反應係俄羅斯總統普京，強烈譴責塞浦路斯政府。皆因塞浦路斯銀行體系存款700億歐元之中，大約有120億歐元來自俄羅斯銀行業及市民，一旦夾硬嚟，俄羅斯無端端要畀15億歐元買路錢，唔嬲有鬼。

近期個市確係兇險，上星期二、三個市狠狠插穿10日及20日線之後，周四先跌後倒升幾十點，以為市況喘定，估唔到上周五同本周一先見真章。塞浦路斯引發新一輪歐豬危機，被淡友充分利用，昨日港股一跌到底，反彈乏力，昨日恒指跌449點收報22,083點，沽空佔大市成交由10.37%進一步升至10.79%。

沽家沽得咁狠，一來之前炒兩會前後有利好經濟政策出台，最後除了一孩政策相關股份炒過一浸之外，全部都唔多對辦。好似光伏股盛傳中的補貼額就奀到暈，光伏股由天堂跌落地獄。

內房股今浪最早見頂，一月中左右大都開始由高位回落，之後利淡消息不絕，例如人民銀行正回購擺出收水姿態，兩會前重申中國對調控樓市的決心，再來是流傳深圳推出完全摸不着頭腦，等於將商品房變保障房，唔准發展商加推加價的「限漲令」傳聞。

水泥業前景唔差

上星期再來是「海沙樓」建屋的消息，反正放得入口食物安全都未搞掂，古勝反而對建材質量出問題唔感到太過意外，消息都似衝着內房企業而來，睇落又唔係巧合咁簡單，領導輪替塵埃落定，說不定有更多壓抑樓價措施出台。

大跌市中，部分早行一步的內房股，低位有盤博吓反彈，方興地產（00817）升2.5%，華潤置地（01109）升2.1%最標青，兩隻股票由一月高位分別跌21及23%，可惜一日中央未正式出手，壓抑樓市陰霾一日未除，只適合身手敏捷兼貼市股民博短線反彈。

對比之下，水泥行業今年受惠於更多保障房及基建落實興建，過去兩日見基金洗得相當狠，如果有條件分注入市的，或者可以酌量開始買吓。

電力股有望靠穩

個別中資電力股逆市靠穩，其中華潤電力（00836）升3.7%，收報20.95元；華能國際（00902）升1.05%，收報7.68元。事實上，在內地經濟保持穩定增長之下，電力需求可望維持穩定，電力股收益相對穩健。

大型電企在傳統火電業務具規模效益、發展新能源業務亦具備優勢，排除煤價大升的可能，電力股是眼前眾多中資股板塊中相對穩陣的選擇。

古勝