坊間好多計身家嘅排名榜，《福布斯》全球富豪榜算係其中一個市場比較關心嘅榜，好多富豪身家多到數唔到，唔係好care人哋點計，不過有「中東股神」之稱嘅沙特阿拉伯阿勒瓦利德王子（Prince Alwaleed Bin Talal Alsaud）就好認真，話《福布斯》亂計一通，歧視中東人；據講係估少佢一大截身家，令排名低咗好多。王子仲話，以後唔玩，誓要同《福布斯》割蓆。
前日公布嘅《福布斯》全球富豪榜，最顯眼嘅變化，係「股神」巴菲特跌出三甲，畀西班牙時裝品牌Zara創辦人奧爾特加霸咗第三位。巴菲特對於跌出三甲好似就冇咩特別反應，但另一個「股神」就好勞氣！
王子以196億美元淨資產喺富豪榜排28，佢透過投資旗艦Kingdom Holding指《福布斯》嘅資產估值過程唔準確，佢多次反映後仍冇改善，所以覺得《福布斯》歧視中東投資者，仲話要同福布斯「割蓆」，要求以後都從富豪榜中被剔除，而Kingdom亦都唔會向《福布斯》提供估值數據。新聞稿仲話，認為福布斯對手彭博富豪榜嘅估值更準確，會繼續同佢哋合作！
《福布斯》回應話，已經調查咗阿勒瓦利德幾年，會喺新一期雜誌發表調查結果，睇來件事仲有後續！
類似事件喺香港都發生過，今年初以20億美元（156億港元）身家躋身《福布斯》香港富豪榜25位嘅大鴻輝興業主席梁紹鴻，都自爆身家超過300億港元，遠高於福布斯嘅估算，不過佢話唔介意，自然唔會發《福布斯》脾氣。