雖然今年港股成交有好轉，但證券行仍然係一間接一間咁停業，尋日港交所（00388）就收到靈獅證券暫停營業嘅通知。講起靈獅，一定會諗起股壇「開心果」藺常念。不過，原來佢喺今年一月底已正式離開靈獅，依家暫時係自由人，證監會個持牌人紀綠顯示佢依家暫時「沒有主事人」，但聽聞佢已泊到新碼頭，前日八大經紀團體春茗，絲絲都見到佢，依舊幽默風趣，睇嚟好快有好消息公布。
話時話，藺常念已經65歲，隨時上岸退休都得，再戰江湖都係「解悶」啫！
講番靈獅，一一年十二月至獲證監會發牌，持有兩個牌，包括證券交易、就證券提供意見。可惜近年靈獅相繼有重要人物離開，好似黃偉康，近期連藺常念都走人，難怪絲絲翻查證監會網站，靈獅依家連負責人員同代表都冇。
證券行難撈係人都知，證券及期貨專業總會會長王國安一見到絲絲就呻，「有仔女都唔好畀佢入呢行！」
係咪咁誇張呀？佢話依家中小經紀行根本冇得做，聽聞一間以前幾活躍嘅中型行將會結束企業融資業務，佢仲話依家生意畀中資搶去不少。睇嚟，中小經紀行停業陸續有來，絲絲都見怪不怪！
余詩韻