絲絲講場：Apple尊崇地位穩過泰山
蘋果公司嘅地圖App失敗收場，最近股票遭狂沽，仍無阻佢連續六年登上《財富》雜誌全球最受尊崇企業榜首。《財富》解釋，以舊年第四季嚟講，Apple狂賺130億美元，依舊係世界最賺錢嘅公司，長年拒絕跟同行鬥平促銷下，各地忠實「果粉」對Apple依然不離不棄，可以話地球上未有一間公司能夠推倒佢嘅王者地位！
Apple何止喺大榜攞第一，同時橫掃所有九個細榜榜首，包括創新、人事管理、財務穩健等等。大榜亞季軍分別由Google同埋亞馬遜奪得。facebook首次入榜，排第四十八位。
聯想寶鋼分類榜排第七
細心發現，《財富》今年全球最受尊崇企業榜頭十名裏面，有七間係一人獨大嘅公司，如亞馬遜、星巴克、巴郡等，即使Apple「教主」喬布斯已經唔喺度，佢嘅影響力猶在。
另外值得留意嘅係，頭十名全部由美國佬包辦，數到第十四名先至見到非美國企業，嗰間正是德國嘅寶馬，歐亞企業彷彿插針不入咁。
細榜排頭位同樣係美國嘅天下，大榜三甲即係Apple、Google同埋亞馬遜，包辦埋創新榜同埋最受尊崇科企頭三位。
喺行業排行榜先至見到我哋熟悉嘅名字：聯想（00992，新上榜，全球電腦業最受尊崇企業第七位）、寶鋼（新上榜，全球金屬業最受尊崇企業第七位）等。
余詩韻