黑田東彥轉任日本央行行長，佢做開嘅亞洲開發銀行行長職位，開始玩估領袖遊戲，中國勢必爭埋一份，英國報道就貼中投公司監事長金立群會角逐。
今次揀行長會較以往更政治化，可以話係中日大戰嘅前哨，皆因中日兩國喺釣魚島主權有爭拗。
日本已經霸咗亞銀行長個位半個世紀，日本財相麻生太郎已經出到口，就算黑田東彥轉任央行行長，騰空出嚟嘅亞銀行長個位，日本志在必得。但英國《金融時報》認為，曾經做過亞銀副行長嘅金立群會出嚟競逐呢個位，結果未必會一面倒。
由一九六六年成立到現時，亞銀行長個位，一向由日本「世襲」，正如世銀行長一向由美國人包辦咁，日本都將亞銀行長視為展現國際地位嘅平台。
不過時移勢易，中國已經取替日本成為世界第二大、亞洲第一大嘅經濟體，加埋因為釣魚島問題，中日關係持續緊張，有傳就算喺亞銀嘅投票權不及日本，中國都有意喺呢個新戰場上同日本一較高下。
《金融時報》認為，除咗金立群之外，現任國際貨幣基金組織（IMF）副總裁朱民都有可能係代表中國，競逐亞銀行長嘅人選。
不過，兩強相爭，目前形勢明顯對日本有利，依家日本、美國、歐元區、澳洲同新西蘭合共已把握50.6%投票權，而且日本係亞銀最大出資國，佔咗先天優勢，中國如果要贏呢場仗，應該並唔容易。
余詩韻