今年一開波，成個港股都熱辣辣，隨着「B轉H股」行動正式開綠燈，港交所（00388）已經即刻踩行油，開大個引擎飆升十幾蚊。除咗港交所同有潛質嘅B股外，Prof. J提提各位，一啲券商股同樣受惠於「B轉H」行動，而Prof. J就特別留意啱啱引入咗社保基金做股東嘅國泰君安（01788）。
港交所去年痛失全球集資王地位，仲要跌到得梗頸四。容乜易好似首歌咁唱：「一變四，四變十二……」今年要有交代，估計會力谷「B轉H股」成為新業務亮點。內地B股流通量不足，一早就有傳要解決呢啲歷史遺留落下來嘅問題。而「B轉H」股正好畀啲有實力企業如萬科、晨鳴紙業等B股轉H股。中集集團（02039）已率先以介紹形式來港上市，雖然無公開發行H股新股，但就開創咗「B轉H」股先河，但係同內地券商有咩關係呢？
就好似今次中集B轉H，佢哋就委任國泰君安做獨家保薦人，內地企業搵番內地券商點都同聲同氣啲。國泰君安引入社保後，Prof. J認為對於集團成功爭取更多新股上市包銷業務會有正面幫助，所以睇好佢今年來自呢個業務嘅盈利會有突破。再加上今年仲有啲背景相似嘅大型內地券商準備AH股上市，國泰君安具有影子概念，而市場又憧憬A股復甦，依家集團股價仲處於第一個升浪中。繼續追蹤，出發！
香港大學電子金融服務榮譽助理教授 徐燦傑