恒生銀行（00011）傳訊及企業責任總監張樹槐（Walter）再向難度挑戰，將會喺今年十月到撒哈拉沙漠毅行一百公里，為第三世界「撲水」，以改善供水設施及衞生情況。
要喺撒哈拉沙漠行一百公里並唔容易，Walter話，除咗要攀過高達海拔一千二百公尺嘅山脊外，仲要徒步行過沙丘陣、乾旱草原，簡直係考驗耐力及體能，仲要五日都無得沖涼！
其實，Walter咁辛苦都只係希望可以籌二十萬元善款，以資助多個非洲及亞洲貧困地區改善食水衞生問題。
Walter咁落力，一眾恒生嘅高層就率先以行動支持呢項善舉，該行副董事長兼行政總裁李慧敏、恒生中國副董事長兼行長薛關燕萍都齊齊捐錢，就連曾經喺恒生工作過嘅恒基地產（00012）獨立非執董歐肇基、新地（00016）執董兼首席財務總監陳國威等都二話不說出錢支持，反應咁熱烈，絲絲相信善款數字隨時超額，實行向籌得一百萬元善款挑戰！